დღეს, საქართველოს პრემიერმინისტრმა, ირაკლი კობახიძემ, პარლამენტის პლენარულ სხდომაზე სამთავრობო პროგრამის წარდგენისას ოპოზიციურ ძალებზე კომენტარი გააკეთა და განაცხადა, რომ "დღეს ოპოზიციის სკამები ცარიელია, თუმცა უნდა ითქვას, დღეს რომ ისინი აქ ისხდნენ, ეს სკამები ზუსტად ისეთივე ცარიელი იქნებოდა, როგორიც დღესაა".

ამასთან, კობახიძემ საზოგადოებას მადლობა გადაუხადა მანდატების მინიჭებისთვის.

"თქვენ იცით, სად უნდოდათ ჩვენი ქვეყნის დაბრუნება, რას განასახიერებენ ის ძალები, რომლებიც ცდილობდნენ ძალაუფლების ხელახლა ხელში ჩაგდებას. მათი ხელწერა 9 წლის განმავლობაში, როდესაც ხელისუფლებაში იყვნენ, იყო ადამიანების წამება, მკვლელობა, ბიზნესის სისტემური რეკეტი, მედიის მიტაცება, ომი, ქვეყნის ტერიტორიების დაკარგვა და ა.შ. ეს მხოლოდ არასრული ჩამონათვალია იმ დანაშაულის, რომელიც ამ ადამიანებს აქვთ ჩადენილი. რა თქმა უნდა, თეორიულად მათი ხელისუფლებაში დაბრუნება ნიშნავდა იმ ყველაფრის დაბრუნებას, რაზეც ახლა გვქონდა საუბარი და ეს საზოგადოებამ ბუნებრივია, არ დაუშვა.

სამწუხაროდ, ამ ადამიანებს ჯერ კიდევ ჰქვიათ ოპოზიცია. დღეს მათი სკამები ცარიელია, თუმცა უნდა ითქვას, დღეს რომ ისინი აქ ისხდნენ, ეს სკამები ზუსტად ისეთივე ცარიელი იქნებოდა, როგორიც დღესაა. მინდა, ქართველ ხალხს კიდევ ერთხელ გადავუხადო მადლობა. სწორედ ქართველმა ხალხმა მოგვანიჭა ჩვენ მანდატი იმისა, რომ შემდეგი 4 წლის განმავლობაში ვიზრუნოთ ჩვენი ქვეყნის სტაბილურ, მშვიდობიან განვითარებაზე", — აცხადებს კობახიძე.

ცნობისთვის, პარლამენტის პლენარულ სხდომაზე ნდობის გამოცხადებისთვის კობახიძეს მოსმენა დაიწყო. იგი წასწვდენია სამთავრობო პროგრამას — "მხოლოდ მშვიდობით, ღირსებით, კეთილდღეობით ევროპისკენ".