საქართველოს პრემიერმინისტრის, გიორგი კვირიკაშვილის, ინფორმაციით, ბორჯომის ხეობაში გაჩენილი ხანძრის ჩასაქრობად 1 აზერბაიჯანულ და 2 ქართულ ვერტმფრენთან ერთად, 2 თურქული ვერტმფრენიც ასრულებს საავიაციო სამუშაოებს.

საგანგებო შტაბის განცხადებით, საქართველოში უკვე შემოვიდა დიდი სახანძრო თვითმფრინავი თურქეთიდან, რომელიც რამდენიმე წუთში ჩაერთვება ხანძრის ლოკალიზაციის პროცესში, ბელორუსიდან კი, მოფრინავს მსოფლიოში ყველაზე დიდი ტვირთამწეობის მქონე სახანძრო-სამაშველო ვერტმფრენი, რომელიც 15 ტონიანი წყლის რეზერვუარით არის აღჭურვილი.

კვირიკაშვილის განცხადებით, ამ ეტაპზე, საცხოვრებელი სახლების მიმართულებით ხანძრის გავრცელების საშიშროება არ არსებობს.

პრემიერმინისტრი მოსახლეობას დაავადებათა კონტროლის ცენტრის რეკომენდაციების დაცვისკენ მოუწოდებს.

წაღვერის ტყეში ხანძარი უკვე მესამე დღეა, რაც არის. როგორც საგანგებო სიტუაციების მართვის სამსახურში ამბობენ, ლოკალიზებული კერები ქარის გამო კვლავ ღვივდება.

შინაგან საქმეთა მინისტრის, გიორგი მღებრიშვილის, აზრით, თურქული თვითმფრინავი უფრო ეფექტიანი იქნება, ვიდრე ვერტმფრენები.