ამ მომენტში [12 ნოემბერი, 20:05], ბათუმში საოლქო საარჩევნო კომისიასთან მოქალაქეები 26 ოქტომბერს ჩატარებული საპარლამენტო არჩევნების შედეგებს აპროტესტებენ.

აქციის ორგანიზატორებმა მანამდე განცხადება გაავრცელეს, სადაც წერია, რომ არჩევნები გაყალბდა და ოცნებამ მათ ხმებთან ერთად ევროპული მომავალიც მოჰპარა.

"26 ოქტომბერს "ქართულმა ოცნებამ" ჩვენს ხმებთან ერთად მოგვპარა ევროპული მომავალი. ამიტომ საქართველოს თითოეული მოქალაქე ვალდებულია დაიცვას საკუთარი ხმა და კონსტიტუციით გარანტირებული საქართველოს ევროპული მისწრაფება. ამ მიზნის საბოლოო მიღწევამდე, მსოფლიოს კიდევ ერთხელ უნდა გავაგონოთ, რომ ეს ქვეყანა გვეკუთვნის ჩვენ და არა რუსეთის მსახურ ოლიგარქ ივანიშვილს. ვროპული მომავალი ივანიშვილთან ერთად მოგვპარა გიორგი კალანდარიშვილმა და ცენტრალურმა საარჩევნო კომისიამ, სადაც ქართველო ხალხის ნება გადაწერეს და ოლიგარქის სასარგებლო შედეგები "დასვეს". ამიტომ, 12 ნოემბერს, 19 საათზე, ჩვენი ხმების დასაცავად ვიკრიბებით ბათუმში, ცესკოს შენობასთან, დ.თავდადებულის #27 და ვითხოვთ ახალ არჩევნებს", — ვკითხულობთ აქციის ორგანიზატორების განცხადებაში.

26 ოქტომბრის საპარლამენტო არჩევნების შემდეგ, დედაქალაქსა და საქართველოს სხვა ქალაქებში, საპროტესტო გამოსვლები ხშირად, თითქმის ყოველდღიურ რეჟიმში ტარდება — ხელახალი არჩევნების ჩატარების მოთხოვნით.