ორბელიანების სასახლეში, პრეზიდენტის ადმინისტრაციასთან აქცია მიმდინარეობს. აქციის მონაწილეებს ადგილზე ბანერები აქვთ გაშლილი, წარწერებით: "სანქციები ივანიშვილს", არ დავნებდებით, "საქართველო არის ევროპა".

ორბელიანების სასახლესთან აქციის მიზანია, რომ პრეზიდენტ სალომე ზურაბიშვილთან შეხვედრაზე მყოფ ევროკავშირის 8 ქვეყნის საგარეო კომიტეტების თავმჯდომარეებს დაანახონ, რომ მოსახლეობა 26-ს ოქტომბერს ჩატარებული არჩევნების შედეგებს არ აღიარებს.

"საერთაშორისო პარტნიორებს გვინდა მადლობა გადავუხადოთ და კიდევ ერთხელ ვთხოვოთ მხარდაჭერა, რადგან ეს ახლა ძალიან მნიშვნელოვანია. ბიძინა ივანიშვილმა არა მხოლოდ ქვეყნის შიგნით უნდა იგრძნოს დისკომფორტი, არამედ ქვეყნის გარეთაც უნდა იგრძნონ. როცა ის და მისი დამქაშები დასანქცირდებიან, ბევრად უფრო მალე მივიღებთ ჩვენს სასურველ შედეგს", — აცხადებენ აქციის მონაწილეები.

აქცია პრეზიდენტის რეზიდენციასთან გუშინ, გვიან ღამით დაიგეგმა. ინფორმაცია აქციის შესახებ ფეისბუქ-ჯგუფ "დაიტოვეში" გავრცელდა. მეორე აქცია საქალაქო სასამართლოსთან 13 საათზე დაიწყება, სადაც 400-ლარიანი ჯებირის საქმეზე დაკავებულების სასამართლო პროცესია ჩანიშნული.