ევროპული საბჭო შარლ მიშელის ირაკლი კობახიძესთან შეხვედრის შესახებ ოფიციალურ ინფორმაციას და ვიდეოკადრებს ავრცელებს.

გავრცელებულ ინფორმაციაში აღნიშნულია, რომ შარლ მიშელისა და ირაკლი კობახიძის შეხვედრა ევროპული პოლიტიკური გაერთიანების შეხვედრის ფარგლებში შედგა, რომელიც 2024 წლის 7 ნოემბერს ბუდაპეშტში გაიმართა.

საქართველოს პრემიერმინისტრმა ჟურნალისტებს განუცხადა, შარლ მიშელს მიაწოდა ინფორმაცია საქართველოში მიმდინარე მოვლენებზე.

"შარლ მიშელს ვუთხარი, რა მდგომარეობაც არის დღეს საქართველოში, მათ შორის ისიც ვუთხარი, რომ ოპოზიციას ძალიან უჭირს ადამიანების მობილიზება, ოპოზიციას არ აქვს სახალხო მხარდაჭერა. ასეთ პირობებში, ვფიქრობ, მოვლენები ბევრად უფრო მარტივად წარიმართება, ვიდრე წარიმართა ოთხი წლის წინ. ოპოზიციას არაფრის რესურსი არ აქვს. ამ შემთხვევაში იმაზე ბევრად ნაკლები რესურსი აქვს, ვიდრე ჰქონდა ოთხი წლის წინ. რაც შეეხება ჩვენს დამოკიდებულებას – მე კიდევ ერთხელ გავიმეორე შარლ მიშელთან, რომ ჩვენ ვართ აბსოლუტურად ღია ნებისმიერი დისკუსიისთვის, ვართ აბსოლუტურად მოქნილი. ჩვენ დავუფიქსირეთ მზაობა დისკუსიებისთვის შარლ მიშელს და ეს არის ჩვენი ღია პოზიცია", – განაცხადა ირაკლი კობახიძემ.