კოალიცია ძლიერი საქართველოსთვის ერთ-ერთმა ლიდერმა, ალეკო ელისაშვილმა ტელეკომპანია ფორმულას ეთერში განაცხადა, რომ სახალხო დამცველ ლევან იოსელიანთან უკვე თვეებია არ ჰქონია კომუნიკაცია.

"ლევანი ჩემი ბავშვობის მეგობარია – მეშვიდე თუ მეექვსე კლასიდან მეგობრები ვართ, უამრავი რამ გვაკავშირებს. მაგრამ რამდენიმე თვეა მასთან კომუნიკაცია არ მქონია, იმიტომ, რომ ბევრი რამ ჩემთვისაც არის უბრალოდ აუხსნელი", – განაცხადა ელისაშვილმა.

ელისაშვილმა ისიც თქვა, რომ იოსელიანის მხარდაჭერას შეცდომად არ თვლის: "ჩემი მეგობარი იყო. რასაც ვაკეთებდი, მხარს რომ ვუჭერდი, სწორად ვაკეთებდი".

შეგახსენებთ, რომ ლევან იოსელიანი სახალხო დამცველად დანიშვნამდე ალეკო ელისაშვილის პარტია მოქალაქეების წევრი იყო.

იოსელიანმა ცოტა ხნის წინ განაცხადა, რომ არჩევნების ლეგიტიმურობის შეფასება "არ არის ის მანდატი, რასაც სახალხო დამცველი ახორციელებს".

"ამაზე ბევრჯერ გვაქვს განცხადება გაკეთებული — ჩვენ არ ვართ სადამკვირვებლო ორგანიზაცია, ჩვენ არ ვახორციელებდით დაკვირვებას, შესაბამისად, ლეგიტიმურია თუ არა არჩევნები, ამაზე ვერც მე, ვერც ჩემს შემდგომი, ვერც ერთი სახალხო დამცველი ამაზე ვერ იმსჯელებს", — განაცხადა სახალხო დამცველმა.