სოფო გელავას და ეთო ბუზიაშვილის ანგარიშების გაყინვა თავდასხმაა ამერიკულ ინსტიტუტზე, რომლის თანამშრომლებიც ისინი არიან — ამის შესახებ ჰელსინკის კომისიის თავმჯდომარე, ჯო უილსონი აცხადებს.

"შევიტყვე, რომ საქართველოს ხელისუფლებამ გაყინა სოფო გელავას და ეთო ბუზიაშვილის საბანკო ანგარიშები იურიდიული განმარტების თუ სასამართლოს ორდერის გარეშე. მჯერა, რომ ეს არის საქართველოს მთავრობის პირდაპირი თავდასხმა სამოქალაქო საზოგადოებაზე. მე ასევე მჯერა, რომ ეს არის თავდასხმა ამერიკულ ინსტიტუტზე, რომელშიც ისინი მუშაობენ.

თუ ეს მიუთითებს იმაზე, თუ რა იქნება მომავალში, ნათელია, რომ ქართული ოცნების მთავრობა სწრაფად მიემართება რუსული სტილის ავტორიტარიზმისკენ. საქართველოს მთავრობამ უნდა მისცეს უფლება მკვლევრებს, იმუშაონ რეპრესიების შიშის გარეშე. ჩვენი “მეგობარი აქტი” დასჯის იმას, ვინც დაარღვევს კანონის უზენაესობას", — აცხადებს აშშ-ის ჰელსინკის კომისია.

როგორც 29 ოქტომბერს ცნობილი გახდა, "ატლანტიკური საბჭოს" ორ თანამშრომელს, რუსული დეზინფორმაციის მკვლევრებს — სოფო გელავასა და ეთო ბუზიაშვილს თიბისი ბანკის და საქართველოს ბანკის ანგარიშები დაუყადაღეს. მათ ანგარიშებს ყადაღა არ ადევს აღსრულების ეროვნული ბიუროსგან.

შეგახსენებთ, რომ 24 ოქტომბერს, ფინანსთა სამინისტროს საგამოძიებო სამსახურის თანამშრომლებმა ჩხრეკა ჩაატარეს ეთო ბუზიაშვილისა და სოფო გელავას სახლებში. მათ ამოიღეს ყველა სახის ელექტრონული მოწყობილობა, მათ შორის, სოფო გელავას შვილის სასკოლო კომპიუტერი.

ფინანსთა სამინისტროს საგამოძიებო სამსახურმა მოგვიანებით განაცხადა, რომ ჩხრეკა ეხება ე.წ ქოლცენტრებს. უწყების განცხადებით, „საგამოძიებო ღონისძიებები წარიმართა „სამ სავარაუდო ე. წ. ქოლცენტრში“.