ჩრდილოეთ კორეის საგარეო საქმეთა მინისტრი ჩოი ცონ-ჰუი, რომელიც კორეის დელეგაციას ხელმძღვანელობს, ოფიციალური ვიზიტით მოსკოვს ეწვევა. ამის შესახებ „ინტერფაქსი“ იტყობინება.

მინისტრის რუსეთში ვიზიტი ორ ქვეყანას შორის სტრატეგიული დიალოგის ფარგლებში განხორციელდება, რომლის გააქტიურებაზეც ორი ქვეყნის ლიდერები, ვლადიმერ პუტინი და კიმ ჩენ ინი 2024 წლის ივნისის სამიტზე შეთანხმდნენ.

ივნისში, რუსეთის პრეზიდენტმა ვლადიმერ პუტინმა და ჩრდილოეთ კორეის ლიდერმა კიმ ჩენ ინმა ხელი მოაწერეს შეთანხმებას ყოვლისმომცველი სტრატეგიული პარტნიორობის შესახებ ფხენიანში. შეთანხმება შედგება 23 მუხლისგან. მე-4 მუხლის თანახმად, თუ ერთ-ერთი მხარე აღმოჩნდება საომარ მდგომარეობაში ერთი ან რამდენიმე სახელმწიფოს მიერ შეიარაღებული თავდასხმის გამო, მეორე მხარე ვალდებულია დაუყოვნებლივ გაუწიოს სამხედრო დახმარება მის ხელთ არსებული ყველა საშუალებით. რუსეთის ფედერაციის სახელმწიფო დუმამ დოკუმენტის რატიფიცირება 24 ოქტომბერს მოახდინა.