საქართველოს მთავრობის ადმინისტრაციაში, ევროკავშირის საბჭოს თავმჯდომარე ქვეყნის, უნგრეთის პრემიერ-მინისტრის, ვიქტორ ორბანის დახვედრის ოფიციალური ცერემონია გაიმართა. მას საქართველოს პრემიერ-მინისტრმა, ირაკლი კობახიძემ უმასპინძლა.

მხარეებს შორის პირისპირ და გაფართოებულ ფორმატში შეხვედრები გაიმართება, რის შემდეგაც ირაკლი კობახიძე და ვიქტორ ორბანი მედიისთვის ერთობლივ განცხადებებს გააკეთებენ.

უნგრეთის პრემიერ-მინისტრი საქართველოში, ოფიციალური ვიზიტით, გუშინ ჩამოვიდა. ორბანი ერთ-ერთ პირველი იყო, ვინც ირაკლი კობახიძეს მმართველი პარტიის საპარლამენტო არჩევნებში გამარჯვება მიულოცა.

მთავრობის ადმინისტრაციის ინფორმაციით, ორბანი ქვეყანას სამთავრობო დელეგაციასთან ერთად ეწვია, რომლის შემადგენლობაში არიან უნგრეთის საგარეო საქმეთა და ვაჭრობის მინისტრი პიტერ სიიარტო, უნგრეთის ეკონომიკური განვითარების მინისტრი მარტონ ნადი, უნგრეთის ფინანსთა მინისტრი მიხაი ვარგა, სახელმწიფო მდივანი იანოშ მატე და სხვა ოფიციალური პირები.