საქართველოში ჩატარებულ საპარლამენტო არჩევნებს საფრანგეთში ქვეყნის ყოფილი ელჩი გოჩა ჯავახიშვილიც ეხმაურება და სოციალურ ქსელში წერს, რომ შედეგებმა "სახტად დატოვა".

ჯავახიშვილი ქართული ოცნების მიერ ჩატარებულ არჩევნებს სპეცოპერაციას უწოდებს.

"ჩემთვის ევროპა აღმა, რუსეთი კი დაღმა, "სპეცოპერაციის" შედეგებით, ჩვენ დავეშვით დაღმა

სახტად დავრჩი. იმდენად, რომ ამ წუთამდე ვერ ამოვღერღე სათქმელი...
ყველაფერი მაინც არ მინდა ვთქვა, რასაც ვფიქრობ. მოსალოდნელი დარღვევების გათვალისწინებით, მეც იმ შედეგს ველოდი, რაც ეგზიტპოლებმა დადეს. ვფიქრობდი, კოალიციური მმართველობით პოლიტიკური კულტურის ახალ ეტაპზე გადავალთ და კიდევ გავიზრდებით მეთქი.

მოკლედ: ჩემთვის ევროპა აღმაა (მიუხედავად ყველაფრისა და მაინც ყველაფრით) ხოლო რუსეთი არის დაღმა (ყველა ასპექტში). ამ "სპეცოპერაციის" შედეგებით, ჩვენ დავეშვით დაღმა. ვიცი მეტყვით ახლა, ყველას გვინდა ევროპა, ოღონდ მშვიდობითა და ღირსებითო. ეს ყველაფერი და დანარჩენი არის ემოციური ბელეტრისტიკა და თავის გამართლების მცდელობა.

დემოკრატიის წესია უმრავლესობის მიერ თავისუფლად, ძალდაუტანებლად გამოხატული ნება უნდა აღსრულდეს. თუ ეს არის დამოუკიდებელი საქართველოს თავისუფალ მოქალაქეთა სუვერენული ნება, აღარ ვიცი რა ვთქვა.

აკი, გვეუბნებოდა ის ბრძენი კაცი: "ტყუილად ნუ ურტყამთ კედელს თავს, შანსი არა გაქვთო... არაფერი შეიცვლებაო".

ერთი რამ ცხადია: ისე და იმდენად შეუსრულა ყველას ყველაფერი, ახლა ვფიქრობ, ალბათ ნიცშესთანაც მართლაც ყველაფერი რიგზე ვერ არის", — წერს ქართველი დიპლომატი.