ატლანტიკური საბჭოს თანამშრომლების, ეთო ბუზიაშვილისა და სოფო გელავას სახლებში ფინანსთა სამინისტროს საგამოძიებო სამსახურის მიერ ჩატარებულ ჩხრეკას ძლიერი საქართველოს ერთ-ერთი ლიდერი ანა ნაცვლიშვილი ეხმაურება და მკვლევრებს სოლიდარობას უცხადებს.

ნაცვლიშვილის თქმით, ქართული ოცნება არჩევნებამდე ორი დღით ადრე იმ მკვლევრებს ესხმის თავს, რომლებიც წლების განმავლობაში, სანდო დასავლურ ორგანიზაციებთან ერთად იკვლევდნენ რუსულ გავლენას საქართველოში.

ამასთან, მან ლევან გოგიჩაიშვილის გუშინდელი თავდასხმის ფაქტიც აღნიშნა და თქვა, რომ მსგავსი რამ მხოლოდ ავტოკრატიის ბოლო ჟამს ახასიათებს.

"ლუსტრაციაა, რომ რუსული ოცნება, არჩევნებამდე ორი დღით ადრე, ღიად თავს ესხმის მკვლევრებს, რომლებიც წლების განმავლობაში არაერთი სანდო, დასავლური ორგანიზაციის ბაზაზე იკვლევდნენ რუსულ გავლენებს საქართველოში და წლები ამხელდნენ რუსულ კვალს ორგანიზებული ყალბი ნარატივების უკან, სოციალური ქსელებში და არამარტო!

მმართველი პარტია რუსული პროპაგანდისტული ნარატივებით ურცხვად ძალადობს საკუთარ მოქალაქეებზე და დაუფარავად ცდილობს, იმოქმედოს ამომრჩეველთა განწყობებზე. სწორედ ამგვარი ფაქტების მხილებაში ჩართულ პირებს შეუცვივდნენ დღეს სახლში და ამოიღეს მათი სამუშაო მოწყობილობები.

ქვეყანაში მხოლოდ იმ შემთხვევაში იქნება მშვიდობა და კეთილდღეობა, როდესაც ოლიგარქიულ ბანდას მოვაშორებთ მმართველობის სადავეებს. გამარჯვებამდე სულ ცოტა დარჩა!", — განაცხადა ნაცვლიშვილმა.