ბიძინა ივანიშვილის შესახებ POLITICO ვრცელ სტატიას აქვეყნებს და დასაწყისშივე მიუთითებს, რომ "საქართველოს ყველაზე მდიდარი ადამიანი, 26 ოქტომბერს დაგეგმილ არჩევნების წინ თავის ქვეყანას რუსეთისკენ ხრის".

გამოცემა ვრცლად მიმოიხილავს თბილისში მსოფლიოს ერთ-ერთი უმდიდრესი ოლიგარქის საცხოვრებელ სივრცეს და ამბობს, რომ 68 წლის მაგნატი ათ წელზე მეტი ხნის განმავლობაში დომინირებს ქართულ პოლიტიკაში. ავტორი აღწერს იმ პოლიტიკურ რეალობას, სადაც პარტიის დეპუტატებს და მინისტრებს ერთგულება მხოლოდ თავად ივანიშვილის მიმართ მოეთხოვებათ და აღნიშნავს, რომ 26 ოქტომბრის არჩევნებს ბევრი დასავლეთსა და რუსეთს შორის არჩევანს უწოდებს, ამიტომ ივანიშვილი მიიჩნევა ძალად, რომელიც საქართველოს ევროპული ორბიტიდან აშორებს, რათა რუსეთი დაამშვიდოს.

Politico აღნიშნავს, რომ ივანიშვილმა საკუთარი ქონება 90-იანი წლებში, რუსეთში დააგროვა - ყველაფერი კი ელექტრონიკის გაყიდვითა და საკუთარი ბანკის, რუსული კრედიტის შექმნით დაიწყო, რომლის შტაბ-ბინაც მოსკოვში იყო.

ასევე გამოცემა წერს, რომ ამ პერიოდში კონკურენტებმა და ორგანიზებული დანაშაულის ჯგუფებმა გამოძალვის მიზნით ოლიგარქის ძმა გაიტაცეს, რის შემდეგაც მან დახმარებისთვის რუსეთის სპეცსამსახურებს მიმართა — Politico აღნიშნავს, რომ როგორც წესი, იმ პერიოდში უშიშროების სამსახურებთან ასეთი თანამშრომლობა უწყვეტ ვალდებულებას ნიშნავდა.

"მისი მეზობელი რუსეთის მსგავსად, საქართველოსაც აქვს დემოკრატიის ზედაპირული თვისებები, მათ შორის პარლამენტი, პრეზიდენტი, პრემიერმინისტრი და არჩევნები. მაგრამ ივანიშვილის მმართველობის პირობებში, ქვეყნის ვითომ წარმომადგენლობითი ინსტიტუტები სულ უფრო მეტად ცენტრალიზებულია ერთ ხელში", — ნათქვამია სტატიაში.

პარტია საქართველოსთვის ლიდერი და ყოფილი პრემიერი, გიორგი გახარია Politico-სთან საუბარში ამბობს:

"მინისტრებს, მათ შორის პრემიერს, უჭირთ გადაწყვეტილების მიღება პარტნიორებთან მოლაპარაკებების დროს, რადგან გადაწყვეტილებები ივანიშვილმა უნდა დაამტკიცოს".

Politico-სთან საუბარში გახარია ოლიგარქზე ამბობს, რომ ივანიშვილი არც პროამერიკელია, არც პროევროპელია, არც პრორუსია და არც პროქართველია, რადგან ის მხოლოდ საკუთარ თავზე ფიქრობს.

გამოცემა ასევე ოლიგარქის ბოლოდროინდელ სხვადასხვა გამოსვლებსაც იხსენებს, მათ შორის წერს ივანიშვილის პირობაზე — აკრძალოს ოპოზიცია. სტატიაში აქცენტი "გლობალური ომის პარტიაზე", "მეორე ფრონტის გახსნაზე", დასავლეთის კრიტიკაზე, ჰომოფობიური და რუსული კანონების მიღებაზეც არის გაკეთებული.

"საქართველოს უმდიდრესი ადამიანისთვის, ევროკავშირში ან NATO-ში შესვლაზე უარის თქმა არ იქნება უკანდახევა. თუმცა, რიგითი ამომრჩევლებისთვის, რომლებიც ოცნებობენ კეთილდღეობასა და პირად თავისუფლებაზე, სიტუაცია განსხვავებულია. მართლაც, მაშინ, როცა ქვეყანაში ბევრი თავის შემოსავალს ივანიშვილის მფარველობის სისტემას უნდა უმადლოდეს, ბევრი სხვა ეყრდნობა დახმარებას ამერიკიდან და ევროპიდან. ივანიშვილს შეიძლება ჰქონდეს ფული, მაგრამ საბოლოო ჯამში მის გადაწყვეტილებებზე პასუხს რიგითი ქართველები აგებენ", - წერს Politico.