დონეცკის ოლქში, სელიდოვოს მახლობლად რუსმა სამხედროებმა 2 უკრაინელი ტყვე დახვრიტეს, — ინფორმაციას უკრაინული მედია ავრცელებს.

მედიის ცნობით, უკრაინელმა სამართალდამცავებმა საქმეზე გამოძიება დაიწყეს.

"მიმდინარეობს გამოძიება ომის ჩვეულებების დარღვევისა და განზრახ მკვლელობის მუხლით". – წერია დონეცკის პროკურატურის განცხადებაში.

ოპერატიული მონაცემების მიხედვით, 18 ოქტომბრის 14:38 საათზე რუსეთის ფედერაციის შეიარაღებული ძალების წარმომადგენლებმა პოკროვსკის რაიონში ტყვედ ორი უკრაინელი ჯარისკაცი აიყვანეს.

ოკუპანტებმა შეუიარაღებელი ტყვეები სახით ძირს დააწვინეს, ცოტა ხანში კი დახვრიტეს.

პროკურორები აღნიშნავენ რომ სამხედრო ტყვეების დახვრეტა ჟენევის კონვენციის უხეში დარღვევაა და საერთაშორისო დანაშაულის სტატუსი აქვს.

უკრაინის გენერალური პროკურატურის მონაცემებით ბოლო ერთი წლის განმავლობაში გახშირდა უკრაინელი ტყვეების დახვრეტა. გენერალური პროკურორის, ანდრეი კოსტინის აზრით ეს არა ერთეული შემთხვევები, არამედ აგრესორი სახელმწიფოს მიზანმიმართული პოლიტიკაა.