საქართველოს შეუძლია გააკეთოს ის რაც უნდა, თუმცა ვერ შეუერთდება ევროკავშირს, იმის გაკეთებით რაც უნდა, – ამის შესახებ სოციალურ ქსელ X-ზე საქართველოში გერმანიის ელჩი, პეტერ ფიშერი წერს.

"ეს [ევროპის საბჭოს კონგრესის დეკლარაცია] არის ევროკავშირის ოფიციალური პოზიცია ევროკავშირის გაფართოებასთან დაკავშირებით საქართველოსთან მიმართებაში, რომელიც მიიღო ევროპის საბჭომ 17 ოქტომბერს. თუ ეს საკითხი შენთვის მნიშვნელოვანია, წაიკითხე და გაიაზრე ეს სიტყვები. საქართველოს შეუძლია გააკეთოს ის, რაც უნდა, მაგრამ იმის გაკეთებით რაც უნდა, ევროკავშირის წევრი ვერ გახდება. თქვენი გადასაწყვეტია", — წერს პეტერ ფიშერი.

ევროპის საბჭოს ადგილობრივ და რეგიონულ ხელისუფლებათა კონგრესმა საქართველოში საპარლამენტო არჩევნების წინ არსებული სიტუაციის შესახებ დეკლარაცია 17 ოქტომბერს მიიღო.

დეკლარაციაში ვკითხულობთ, რომ კონგრესი ღრმა შეშფოთებას გამოხატავს საქართველოში დემოკრატიული უკუსვლის აშკარა ნიშნებისა და ადამიანის უფლებების შესუსტების გამო, "რაც გამოიხატა საზოგადოებაში გაზრდილი პოლარიზაციითა და ისეთი კანონმდებლობის ამოქმედებით, რომელიც ევროპის საბჭოს სტანდარტებს ეწინააღმდეგება".