ევროპის საბჭოს ადგილობრივ და რეგიონულ ხელისუფლებათა კონგრესმა საქართველოში საპარლამენტო არჩევნების წინ არსებული სიტუაციის შესახებ დეკლარაცია მიიღო.
დეკლარაციაში ვკითხულობთ, რომ კონგრესი ღრმა შეშფოთებას გამოხატავს საქართველოში დემოკრატიული უკუსვლის აშკარა ნიშნებისა და ადამიანის უფლებების შესუსტების გამო, "რაც გამოიხატა საზოგადოებაში გაზრდილი პოლარიზაციითა და ისეთი კანონმდებლობის ამოქმედებით, რომელიც ევროპის საბჭოს სტანდარტებს ეწინააღმდეგება".

დეკლარაციის ტექსტში ნახსენებია კონგრესის მონიტორინგის კომიტეტის 2024 წლის 2 ივლისის განცხადება, რომელშიც აღნიშნული იყო საქართველოს დემოკრატიული ნორმებიდან და სტანდარტებიდან გადახრის რისკი. მასში, ასევე საუბარი იყო გახშირებულ თავდასხმებზე, დაშინებასა და განსხვავებული აზრის გამომხატველ პირებზე განხორციელებულ ზეწოლაზე.

"იზრდება შეშფოთება საქართველოს ხელისუფლების ვალდებულებების მიმართ, დაიცვას ევროპული დემოკრატიული პრინციპები და იაროს ევროპული მომავლისკენ, რომელიც დაფუძნებულია დემოკრატიაზე, ადამიანის უფლებებსა და კანონის უზენაესობაზე, ხელისუფლების ყველა დონეზე", — წერია დეკლარაციაში.

კონგრესი კიდევ ერთხელ მოუწოდებს საქართველოს ხელისუფლებას, გააუქმოს ადამიანის უფლებათა საწინააღმდეგო კანონმდებლობა და თავი შეიკავონ ისეთი ქმედებისაგან, რომელიც გააღრმავებს საზოგადოების შემდგომ პოლარიზაციას, შექმნის პოლიტიკური პლურალიზმის საფრთხეს, ადამიანის უფლებებს დაარღვევს, ან ძირს გამოუთხრის დემოკრატიის საფუძვლებს.

"ეს ყველაფერი საზიანო იქნება ადგილობრივი თვითმმართველობისთვის საქართველოში. საქართველო უნდა დაუბრუნდეს დემოკრატიული კონსოლიდაციის გზას", — ნათქვამია დეკლარაციაში.