საქართველოს სახალხო დამცველთან არსებული ტოლერანტობის ცენტრისა და ეთნიკური უმცირესობების საბჭოს წარმომადგენლები ერთობლივ განცხადებას ავრცელებენ, რომელშიც სამთავრობო პროპაგანდისტული არხი POSTV-ის არმენოფობიულ სიუჟეტს გმობენ, რომელშიც აღნიშნული ტელევიზიის ჟურნალისტი კოალიცია ძლიერი საქართველოს ერთ-ერთ ლიდერს, მამუკა ხაზარაძეს ეკითხება, თუ "რატომ მალავს იგი სომხურ წამომავლობას".

"ამ სიუჟეტს მოყვა პარტია "ხალხის ძალის" წარმომადგენლის, ზურაბ ქადაგიძის მსგავსი ტიპის მადისკრედიტირებელი განცხადება და ასევე POSTV-ის მორიგი სიუჟეტი, სადაც ტელეარხი ცდილობს, დაამტკიცოს მამუკა ხაზარაძის თითქოსდა „სომხური“ წარმომავლობა. მსგავსი შინაარსის მედიაპროპაგანდა აქტიურად მიმდინარეობს სოციალური ქსელებითაც.

ჩამოთვლილ შემთხვევებში საქმე გვაქვს არმენოფობიული განწყობით პოლიტიკურ მანიპულირებასა და პოლიტიკური ბრძოლის ბინძურ მეთოდთან, კონკრეტული პოლიტიკოსისთვის სხვა ეთნოსის იდენტობის გამიზნულ მიწერასთან და ამ საფუძველზე არმენოფობიური პროპაგანდისა და პოლიტიკური დისკრედიტაციის დაუშვებელ, ღირსების შემლახველ მცდელობასთან.

სახალხო დამცველთან არსებული ტოლერანტობის ცენტრი და სახალხო დამცველთან არსებული ეთნიკური უმცირესობების საბჭოს წევრი ხელმომწერი ორგანიზაციები კატეგორიულად ვგმობთ და სრულიად დაუშვებლად მივიჩნევთ საქართველოში წლების წინ დამკვიდრებული ამ მავნებლური, ქვეყნის ინტერესების საზიანო „ტრადიციის“ განახლების მცდელობას, - ეთნიკური ნიშნის გამოყენებას პოლიტიკური დისკრედიტაციის, დისკრიმინაციისა და სტერეოტიპული წარმოდგენებით მანიპულაციისთვის", — წერია განცხადებაში.

ტოლერანტობის ცენტრმა და ეთნიკური უმცირესობების საბჭომ POSTV-ისა და არმენოფობიის გამვრცელებელ სხვა სუბიექტებს მოუწოდა, საჯაროდ მოიხადონ ბოდიში ეთნიკური იდენტობის დისკრედიტაციის მიზნით გამოყენების გამო და სამომავლოდაც უარი თქვან მსგავს პრაქტიკაზე, რომელიც საქართველოს ეროვნულ ინტერესებს ეწინააღმდეგება და შეუსაბამოა დემოკრატიული საზოგადოების პრინციპებთან.

გარდა POSTV-ის არმენოფობიული სიუჟეტისა, განცხადებაში საბჭო გმობს ტელეკომპანია რუსთავი 2-ის მიერ 10 ოქტომბრის სიუჟეტში აზერბაიჯანულ თემთან მიმართებით ტერმინ "დიასპორას" გამოყენებას.

"საქართველო ეთნიკურად მრავალფეროვანი ქვეყანაა, საქართველოს მოქალაქეები განსხვავდებიან ეთნიკური, რელიგიური, ენობრივი, კულტურული ნიშნით, მაგრამ ჩვენ, უპირველეს ყოვლისა, ვართ საქართველოს მოქალაქეები, ხოლო ტერმინი „დიასპორა“ ატარებს შინაარსს, რომლის მიხედვით დიასპორის წევრები სამშობლოდ სხვა ქვეყანას მიიჩნევენ და შესაბამისად, სხვა ქვეყანას წარმოადგენენ ახლანდელი განსახლების ქვეყანაში.

სახალხო დამცველთან არსებული ეთნიკური საბჭო მოუწოდებს ხსენებულ მედიას, მსგავსი ტერმინები აღარ გამოიყენოს საქართველოს მოქალაქეების, მოქალაქეთა ჯგუფებისა თუ მთელი თემის აღწერისას, მათ შესახებ მოსახლეობის ინფორმირებისას; აქვე გვინდა მოვუწოდოთ ყველა მედიას, პარტიას, პოლიტიკოსს, საზოგადოებრივი აზრის შექმნაში ჩართულ ორგანიზაციებსა და პიროვნებებს, უარი თქვან ხსენებული ტერმინით საქართველოში ამა თუ იმ ეთნიკური ჯგუფის მოხსენიებაზე, რადგან ჩვენ არ ვართ დიასპორა, ჩვენ ვართ საქართველოს მოქალაქეები და ჩვენი საერთო სამშობლო არის საქართველო!" — აღნიშნულია განცხადებაში.

განცხადებას ხელს აწერენ: სამოქალაქო ინტეგრაციის ფონდი, ქართულ-უკრაინული წიგნისა და პრესის სახლი, ქართველ სომეხთა კავშირი, ღია საზღვრები, საქართველოს სომხური სათემო პლატფორმა, საქართველოს უდიები, სამოქალაქო ჩართულობისა და აქტივიზმის ცენტრი, სოლიდარობის მუზეუმი, საქართველოს ქურთული ასოციაცია "რონაი", სათემო კავშირი "პანკისის კეთილდღეობისათვის", სახალხო დამცველთან არსებული ტოლერანტობის ცენტრი.

ცნობისთვის, სამთავრობო პროპაგანდისტულმა არხმა POSTV-მ 11 ოქტომბერს გამოაქვეყნა ვიდეო, სადაც ჩანს, რომ მათ მიერ გაგზავნილი ჟურნალისტი კოალიცია ძლიერი საქართველოს ერთ-ერთ ლიდერს, მამუკა ხაზარაძეს ეკითხება, რატომ მალავს "სომხურ წარმომავლობას", რისი "დამადასტურებელი ფაქტებიც" აქვთ.

პროპაგანდისტული არხის ჟურნალისტი კლასიკურ შოვინისტურ მანიპულაციას მიმართავს და დათქმას აკეთებს: "სომხები ხომ ჩვენი მოძმე ერი არიან, საუკეთესო ხალხი" - და ამატებს - "რატომ გრცხვენიათ?".

საქართველოში, შოვინიზმსა და არმენოფობიაზე კაპიტალიზების მსურველები დიდი ხანია ამ "ხრიკს" მიმართავენ.

ერთი მხრივ ისინი ცდილობენ თავი აირიდონ რომელიმე ეთნოსის უარყოფითი შეფასებისგან, მეორე მხრივ კი ამ ეთნოსის მიმართ არსებულ სტერეოტიპებსა და შოვინიზმზე კაპიტალიზდნენ.