დღეიდან შეგიძლიათ Google-ს ქართულადაც დაელაპარაკოთ და დავალებები მისცეთ. გუგლის აპლიკაციებს კიდევ 30 ენის ხმოვანი ამოცნობის ფუნქცია დაემატა, რაც იმას ნიშნავს, რომ გუგლს ახლა 119 ენა ესმის და მილიარდზე მეტ ადამიანს ემსახურება.

გუგლის პრეს რელიზში ყურადღება ქართულ ენაზეა გამახვილებული: "განახლების შედეგად გვემატება უძველესი ქართული ენა, მისი მეათე საუკუნის დროინდელი ანბანით", ვკითხულობთ რელიზში.

იმ ენების სია, რომელსაც გუგლის აპები მომხმარებლის ლაპარაკისას ამოიცნობენ ასე გამოიყურება: აჰმარული (ეთიოპია) ,სომხური (სომხეთი), აზერბაიჯანული (აზერბაიჯანი), ბანგალური (ბანგლადეში, ინდოეთი) ქართული (საქართველო) და სხვა.

ახალი ენების დამატებისა და საუბრის ნიმუშების ასაღებად, Google მშობლიურ ენაზე მოსაუბრეებს პოპულარული ფრაზების წაკითხვას სთხოვდა. ახალი ენები, ასევე, ხელმისაწვდომი გახდა Cloud Speech API-ში და მალე დაემატება გუგლის სხვა აპლიკაციებსა პროდუქტებსაც, მათ შორის Google Translate-ს.

შესაბამისი ფუნქციის გასააქტიურებლად Play Store-დან გადმოტვირთეთ და დააყენეთ Gboard და აირჩიეთ ქართული ენა. ამის შემდეგ დააჭირეთ მიკროფონს და დაიწყეთ საუბარი.

ხმით ძებნის ფუნქციის გასააქტიურებლად, გახსენით Google-ის აპლიკაცია, მარცხენა ზედა კუთხეში დააჭირეთ მენიუს და გადადით პარამეტრების განყოფილებაში, შემდეგ აირჩიეთ Voice (ხმა) და აირჩიეთ ქართული ენა.