საქართველოს პროკურატურა შინაგან საქმეთა მინისტრისა და რუსი პრენკერის შესაძლო სატელეფონო საუბრის ავთენტურობის შემოწმებას არ აპირებს. უწყებაში On.ge-სთან ამ საკითხზე დამატებით კომენტარს არ აკეთებენ.

რამდენიმე დღის წინ, უკრაინულ მედიაში გავრცელდა აუდიო ჩანაწერი, სადაც თითქოს უკრაინისა და საქართველოს შინაგან საქმეთა მინისტრები მიხეილ სააკაშვილის ექსტრადიციის საკითხს განიხილავენ. მედიასაშუალება strana.ua-ის მტკიცებით, გიორგი მღებრიშვილი რუსმა პრენკერმა გაასულელა. პირი, რომელიც მღებრიშვილად არის წარმოჩენილი მიხეილ სააკაშვილს უცენზურო სიტყვებით მოიხსენიებს და ამბობს, რომ საქართველოში მის ექსტრადიციას არ მოითხოვენ.

შინაგან საქმეთა სამინისტრო უარყოფს, რომ აღნიშნული საუბარი ნამდვილად შედგა. უწყების პოზიციას იზიარებს საპარლამენტო უმრავლესობაც. დეპუტატის, მამუკა მდინარაძის თქმით, ასეთი კავშირები ღია სატელეფონო ხაზით არ დგება, ჩანაწერის ავთენტურობაზე სეროზულად საუბარი არ შეიძლება და შესაბამისად მის შინაარსს მნიშვნელობა არ აქვს.

რაც შეეხება ოპოზიციურ პარტიებს, ისინი მიიჩნევენ, რომ ჩანაწერით კიდევ ერთხელ დადასტურდა, რომ მიხეილ სააკაშვილის მიმართ ნამდვილად პოლიტიკური დევნა მიმდინარეობს. ერთიანი ნაციონალური მოძრაობა ჩანაწერის ავთენტურობის შესამოწმებლად საერთაშორისო უწყებებისთვის მიმართვას გეგმავს.