მილიარდერი, გამომგონებელი და ინვესტორი ილონ მასკი ბოლო პერიოდში საგრძნობლად აძლიერებს ტრამპის მხარდაჭერას.

4 ოქტომბერს spaceX-ისა და Tesla-ს გენერალურმა დირექტორმა X-ზე დაწერა, რომ ბატლერში, ტრამპის წინასაარჩევნო შეხვედრას შეუერთდებოდა.

"იქ ვიქნები მხარდასაჭერად!" — დაწერა მასკმა

შეგახსენებთ, სწორედ პენსილვანიის შტატის აღნიშნულ ქალაქში (ბატლერში) სცადეს ტრამპის მოკვლა მიმდინარე წლის 13 ივლისს.

6 ოქტომბერს ამომრჩევლებთან შეხვედრა იმ ადგილას შედგა, სადაც ტრამპი სასწაულებრივად გადაურჩა სიკვდილს.

ილონ მასკმა თავის მხარდამჭერ გამოსვლაში ტრამპის მომხრეებს მოუწოდა, ამომრჩევლებად დარეგისტრირდნენ და მივიდნენ არჩევნებზე, რომელიც ზუსტად ერთ თვეში, 5 ნოემბერს გაიმართება. მისი მტკიცებით, ტრამპის დამარცხების შემთხვევაში, ეს შესაძლოა, მისი"ბოლო არჩევნები" იყოს.

მან განაცხადა, რომ დემოკრატებმა ასეთ შემთხვევაში, შეიძლება შეცვალონ კანონმდებლობა და აღარ დათმონ ხელისუფლება. ტრამპის ოპონენტები კი, თავის მხრივ, სწორედ რესპუბლიკელებს მიიჩნევენ დემოკრატიის საფრთხედ.

ფოტო: Copyright Evan Vucci/Copyright 2024 The AP. All rights reserved

პენსილვანია მნიშვნელოვანი შტატია აშშ-ის პრეზიდენტობის ორივე კანდიდატისთვის, რადგან ამ შტატში ჯერჯერობით უპირატესობა არცერთ მათგანს არ აქვს, შესაბამისად შტატში წარმატებამ შესაძლოა გადამწყვეტი როლი ითამაშოს საპრეზიდენტო მარათონში.