კომუნიკაციების ეროვნული კომისია ამ ქვეყანაში ნომერ პირველი ცენზორი, გამოხატვის თავისუფლების ჯალათი გახდა და არა დამცველი, — ასე გამოეხმაურა ერთიანობა ნაციონალური მოძრაობის ლიდერი თამარ კორძაია მთავარი არხის, ტვ-პირველისა და ფორმულას ერთობლივ განცხადებას. მისი თქმით, კომუნიკაციების ეროვნული კომისია "გამოხატვის თავისუფლების ჯალათია".

"კომუნიკაციების ეროვნული კომისია ამ ქვეყანაში ნომერ პირველი ცენზორი გახდა, იმიტომ რომ პირველი გადაწყვეტილება, რის გამოც კომისიამ ეს ტელევიზიები დაასანქცირა, სიძულვილის შემცველი კლიპის ეთერში გაშვება იყო, რომელიც სამოქალაქო საზოგადოების წარმომადგენლებს თავს ესხმის. ამ ეტაპზე უკვე ეს ბანერები სატელევიზიო რეკლამის სახით უნდა განათავსონ, რაზეც ტელევიზიებმა კომუნიკაციების ეროვნულ კომისიას წინასწარ გაუგზავნეს კითხვა, ჩაესვათ თუ არა. კომისია ავალებს, რომ ეს რეკლამა ჩასვან. კომისია ამ ქვეყანაში გამოხატვის თავისუფლების ჯალათია და არა დამცველი", — განაცხადა თამარ კორძაიამ.

შეგახსენებთ, რომ სამმა ტელევიზიამ — მთავარმა არხმა, ტვ-პირველმა და ფორმულამ ერთობლივი განცხადება გაავრცელეს, სადაც წერენ, რომ ქართული ოცნება "ტელევიზიებისგან იმ ამორალური ბანერების ეთერში გაშვებას მოითხოვს, სადაც მმართველი პარტია საარჩევნოდ უკრაინელი ხალხის ტრაგედიით სპეკულირებს". ისინი წერენ, რომ არ აპირებენ ხელი შეუწყონ მმართველი პარტიის რუსულ პროპაგანდას და აღნიშნული ვიდეორგოლების ეთერში გაშვებას არ აპირებენ, მაშინაც კი, თუ "დიდძალ ჯარიმებს დააკისრებენ".