დღეს, ოკუპირებული აფხაზეთის ე.წ. საგარეო საქმეთა სამინისტრომ დაგმო ისრაელის მიერ სირიაში განხორციელებული თავდასხმა, რომლის დროსაც ოკუპირებული აფხაზეთის ე.წ. რესპუბლიკის საელჩოც დაიბომბა, რის შედეგადაც სამი ადამიანი დაიღუპა, სამი — დაშავდა. ინფორმაციას ოკუპირებული აფხაზეთის ე.წ. საგარეო საქმეთა სამინისტროს პორტალი ავრცელებს.

"გუშინ ისრაელის საჰაერო ძალებმა გოლანის მაღლობებიდან, დამასკოს მეზეს რაიონში ავიაიერიში მიიტანეს საცხოვრებელ კორპუსზე. იმ ტერიტორიაზე განლაგებულია სხვადასხვა ქვეყნის დიპლომატიური წარმომადგენლობები, მათ შორისაა აფხაზეთის რესპუბლიკის საელჩო სირიის არაბთა რესპუბლიკაში. თავდასხმის შედეგად სამი მშვიდობიანი მოქალაქე დაიღუპა, სამი კი დაიჭრა.

აფხაზეთის საგარეო საქმეთა სამინისტრო კატეგორიულად გმობს ისრაელის სამხედრო ძალების მხრიდან სირიის მოსახლეობაზე და ინფრასტრუქტურაზე თავდასხმას", — წერია ოკუპირებული აფხაზეთის, ე.წ. საგარეო საქმეთა სამინისტროს განცხადებაში.