თითქოს გუშინ იყო, ემინემის Mockingbird-ს რომ ვუსმენდით და მის პატარა შვილს ვუყურებდით კლიპში...

ემინემი მალე ბაბუა გახდება — ამის შესახებ რეპერმა თავის ფანებს ახალი სიმღერის, Temporary-ს კლიპიდან აუწყა. სიმღერის კლიპში ის ვიდეოცაა ჩასმული, რომელშიც ჰეილი მამამისს ფეხმძიმობის შესახებ ამცნობს — რეპერს შვილი ამერიკული ფეხბურთის მაისურს აწვდის, რომელსაც უკან "ბაბუა" აწერია. კლიპში ბევრი ოჯახური მომენტის ამსახველი ვიდეო გვხვდება, რომელთა უმეტესობაში სწორედ ჰეილის ბავშვობის კადრები ჩანს.

ემინემის რეაქცია გულის ამაჩუყებელია — რეპერს თვალები უფართოვდება და პირი ღია რჩება. აშკარაა, რომ მამა-შვილს განსაკუთრებული ურთიერთობა აქვს და ოჯახის ახალი წევრის შესახებ გაგებული სიახლე ემინემისთვის ძალიან სასიხარულო აღმოჩნდა.

ჰეილი ჯეიდ მაზერსი 28 წლისაა და 2023 წელს დაქორწინდა ევან მაკლინტოკზე, რომელიც მიჩიგანის უნივერსიტეტში სწავლისას გაიცნო.