ჩეჩნეთში ყურანის დაწვისთვის დაპატიმრებულ, რამზან კადიროვის შვილის მიერ ნაცემ ნიკიტა ჟურაველს ახალი, ბევრად მძიმე ბრალი წაუყენეს. ვოლგოგრადის ოლქის პროკურატურა ჟურაველს სახელმწიფო ღალატს ედავება, რაც მაქსიმალურ სასჯელს, სამუდამო პატიმრობას ითვალისწინებს.

პროკურატურის ვერსიით, ჟურაველმა უკრაინის უსაფრთხოების სამსახურს მესენჯერით შესთავაზა თანამშრომლობა და 2023 წელს გაუგზავნა სამხედრო დაზვერვის ცნობები. ასევე - მონაცემები ერთ-ერთი სამხედრო ნაწილის ავტომობილის გადაადგილების შესახებ.

ნიკიტა ჟურაველი 2023 წლის მაისში დააკავეს მას შემდეგ, რაც ტელეგრამ არხებზე გავრცელდა ვიდეო, რომელშიც ის ვოოლგოგრადის მეჩეთის წინ ყურანს წვავს. 2024 წლის თებერვალში 20 წლის ახალგაზრდას ხულიგნობისა და რელიგიური გრძნობების შეურაცხყოფისათვის 3.5 წლით პატიმრობა მიესაჯა.