ირაკლი კობახიძის განმარტებით, ბიძინა ივანიშვილი ამერიკელ პოლიტიკოსებსა და მაღალჩინოსნებს ფინანსური შანტაჟის გამო აღარ შეხვდება. პრემიერის თქმით, ეს მმართველი პარტიის დასავლეთთან ურთიერთობაზე არ აისახება.

"საუბარი იყო ბიძინა ივანიშვილის პირად კომუნიკაციაზე, მის პირად შეხვედრებზე პოლიტიკოსებთან და ბიუროკრატებთან. აქ თქვა მან ერთი მარტივი რამ: ვიდრე გრძელდება ფინანსური შანტაჟი, ის თავს იკავებს ნებისმიერი პოლიტიკოსთან და ბიუროკრატთან, ვისაც შეიძლება შეხვედრის სურვილი ჰქონდეს. არსებობს ეს რისკი, რომ შეიძლება ის იყოს გლობალური ომის პარტიის გავლენის ქვეშ — ეს იყო აქ ნათქვამი.

ჩვენ, რა თქმა უნდა, სრულიად გუნდი, ვინარჩუნებთ კომუნიკაციას, მათ შორის, პოლიტიკოსებთან, ბიუროკრატებთან, ჩვენ ამას ვაკეთებთ, პირველ რიგში, იმისათვის, რომ სწორ მომენტში, და ეს მოხდება აუცილებლად მომავალ წელს, ვიზრუნოთ მაქსიმალური ინტენსივობით ურთიერთობების გადატვირთვაზე", — განაცხადა ირაკლი კობახიძემ.

შეგახსენებთ, რომ 1-ელ ოქტომბერს აშშ-ის საელჩო ბიძინა ივანიშვილის კრედიტ სუისთან დავით სპეკულაციის ფაქტს გამოეხმაურა და პოსტი გამოაქვეყნა, რომელშიც აღნიშნულია, რომ შეერთებული შტატები ამ დავასთან არაფერ შუაშია, რადგან მას ბერმუდისა და სინგაპურის სასამართლოები განიხილავენ. ამის საპასუხოდ სოციალურ ქსელში ბიძინა ივანიშვილის წერილი გავრცელდა, სადაც ნათქვამი იყო, რომ მას აშშ და ევროკავშირი შანტაჟის კამპანიაში არასოდეს დაუდანაშაულებია და ამ კამპანიის უკან ის მოიაზრებს ძალებს, რომლებსაც ე.წ. "გლობალური ომის პარტიას" უწოდებს. ივანიშვილის თქმით, ამ ძალას აშშ-სა და ევროკავშირში მიმდინარე პროცესებზე აქვს გავლენა და სწორედ ეს არის მთავარი მიზეზი, რატომაც ფინანსური შანტაჟის დასრულებამდე, უარს აცხადებს ამერიკელ პოლიტიკოსებთან და ბიუროკრატებთან შეხვედრებზე.

ცნობისათვის, ბიძინა ივანიშვილმა 2024 წელს უარი განაცხადა შეხვედროდა ევროპულ და ევრაზიულ საკითხებში სახელმწიფო მდივნის თანაშემწეს ჯეიმს ო'ბრაიანს და აშშ-ის სენატორ ჯინ შაჰინს.