ღია ცის ქვეშ ღამეების თენების და შიმშილობის დაწყებიდან 32-ე დღეს, შუქრუთელები დღეს პრემიერ-მინისტრთან შესახვედრად მთავრობის ადმინისტრაციასთან მივიდნენ. მანამდე, მათ 19 სექტემბერს, მთავრობის კანცელარიაში კობახიძესთან შეხვედრის მოთხოვნით წერილი შეიტანეს. პრემიერი გაფიცულ მაღაროელებს ამ დრომდე არ შეხვედრია.

13 სექტემბრის ბრიფინგზე მიშიმშილე შუქრუთელებთან დაკავშირებით განაცხადა, რომ "ჯერჯერობით კომპანიის საქმეა მოლაპარაკების წარმოება". დღეს კი ჟურნალისტებს დაჰპირდა, რომ მომავალ ბრიფინგამდე კიდევ ერთხელ ჩაეძიებოდა საქმეს. მისი თქმით, ასეთი აქციები ხშირად წინასაარჩევნო პერიოდს ემთხვევა, რაც სამწუხარო მოვლენაა.

"მე, ზოგადად, იცით, რომ არასდროს, არასდროს არ მოვრიდებივარ შეხვედრებს, მაგრამ რა ინფორმაციაც მეც მქონდა და, ბუნებრივია, ეს არ არის მხოლოდ კომპანიის ინფორმაცია, ძირითადად სამი პირი იყო ჩართული, ყოველ შემთხვევაში თავიდან, ახლა არ ვიცი როგორ არის, ამ აქციის ორგანიზებაში. ხშირად ემთხვევა ხოლმე წინასაარჩევნო პერიოდს ასეთი აქციები, რაც სამწუხარო მოვლენაა. მე რა ინფორმაციაც მაქვს, მათ შორის რაც გადავამოწმე, ერთ-ერთ პირს ჰქონდა 80 000 ლარი აღებული კომპენსაცია, მეორეს 50 ათასი, თუმცა, მიუხედავად იმისა, რომ ეს იყო მიღებული, ჩაბარებული, ამის მიუხედავად მოვიდა არჩევნები და…

გპირდებით, რომ შემდეგ ბრიფინგამდე უფრო დეტალურად მოვიძიებ ინფორმაციას, შეგვიძლია ერთმანეთშიც გავცვალოთ ეს ინფორმაცია, საჭიროების შემთხვევაში ნაბიჯებიც გადაიდგმება, მაგრამ გპირდებით, რომ შემდეგ ბრიფინგამდე უფრო დეტალური ინფორმაციით წარვდგები.

თუ პოზიციები არის სწორი და სიმართლე არის აქციის მონაწილეების მხარეს და პლუს არ არსებობს რესურსი, რომ მოგვარდეს კომპანიასა და ამ პირებს შორის, ამ შემთხვევაში საჭიროა შეხვედრა, მაგრამ თუ სხვა რესურსი არსებობს, ამ შემთხვევაში ჯობია, რომ კომპანია და შესაბამისი პირები მოგვარდნენ ერთმანეთთან," — განაცხადა კობახიძემ.

შეგახსენებთ, რომ შუქრუთელებმა და მათმა მხარდამჭერებმა გუშინ მსვლელობა მოაწყვეს, სოლოლაკში, ბიძინა ივანიშვილის სახლისკენ, თუმცა აქციის მონაწილეები ქართული ოცნების საპატიო თავმჯდომარის სახლამდე პოლიციამ არ მიუშვა.

3 დღის წინ მოშიმშილეებს, შიმშილობის 29-ე დღეს პარლამენტის წინ მოშიმშილე შუქრუთელებს ქალებიც შეუერთდნენ. პოლიციამ არც ქალებს მისცა უფლება, ლეიბები გაეშალათ.

შუქრუთელები უკვე 190 დღეზე მეტია უწყვეტი პროტესტის რეჟიმში იმყოფებიან და კომპანია ჯორჯიან მანგანეზის საქმიანობის შედეგად სოფელ შუქრუთისთვის მიყენებული ზარალის ანაზღაურებას და პროცესში ცენტრალური ხელისუფლების ჩართვას ითხოვენ.

მეტი ინფორმაცია შუქრუთელების უწყვეტ პროტესტზე მიიღეთ აქ.