ისრაელმა ბეირუთში ჰეზბოლას შტაბი დაბომბა. თავდასხმა დრამატულად ზრდის ლიბანში კონფლიქტის ესკალაციის შანსს და მინიმუმამდე ამცირებს სივრცეს ცეცხლის შეწყვეტის შეთანხმების მიღწევისთვის, რომელსაც მედიაციას ჯო ბაიდენის ადმინისტრაცია უწევდა.

ჯერჯერობით უცნობია, შეეწირა თუ არა თავდასხმას ორგანიზაციის ლიდერი, ჰასან ნასრალა, ან იმყოფებოდა თუ არა ის თავდასხმის მომენტში შენობაში.

თუ ნასრალას დაღუპვა დადასტურდება, ეს ბოლო ათწლეულების ერთ-ერთი უმძიმესი დარტყმა იქნება, რომელსაც ისრაელი ორგანიზაციას მიაყენებს. ჰასან ნასრალა ჰეზბოლას 1992 წლიდან მართავს, მას შემდეგ, რაც ისრაელმა ორგანიზაციის ყოფილი ლიდერი მოკლა.

ისრაელის თავდაცვის ძალების სპიკერმა, ადმირალმა დანიელ ჰაგარმა დაადასტურა, რომ არმიამ ზუსტად დაარტყა ორგანიზაციის ცენტრალურ შტაბს, რაც ისრაელის მოსახლეობის უსაფრთხოების უზრუნველყოფით ახსნა.

ბოლო რამდენიმე დღის განმავლობაში ისრაელისა და ჰეზბოლას დაპირისპირებას ლიბანში დაახლოებით 700 ადამიანი შეეწირა, 90000-ს კი სახლის დატოვება მოუწია.