აშშ-ის პრეზიდენტმა დონალდ ტრამპმა რუსეთის პირველ პირს ვლადიმერ პუტინს მადლობა გადაუხადა, რადგან პუტინმა რუსეთში ამერიკელი დიპლომატების რაოდენობის შემცირება გადაწყვიტა.

"მინდა მადლობა გადავუხადო, რადგან სწორედ ახლა ვცდილობთ პერსონალის ხარჯების შემცირებას. რაც შემეხება მე, მოხარული ვარ, რომ საკმაოდ ბევრი თანამშრომელი გაათავისუფლა და ახლა ნაკლები ხარჯი გვაქვს,“- განაცხადა ტრამპმა.

ივლისის ბოლოს რუსეთმა ამერიკის შეერთებული შტატებისგან დიპლომატების რაოდენობის 455-მდე შემცირება და ამერიკაში მომუშავე რუსი დიპლომატების რაოდენობასთან გათანაბრება მოითხოვა. საუბარია რუსეთიდან 755 დიპლომატის გაწვევაზე. რუსეთის საგარეო საქმეთა სამინისტროს განცხადებაში ამ ცვლილებისთვის სარეკომენდაციო ვადად პირველ სექტემბერია დასახელებული. გარდა ამისა, რუსეთის საგარეო საქმეთა სამინისტრომ ამერიკის საელჩოს მათ განკარგულებაში არსებული აგარაკითა და განთავსებული საწყობებით სარგებლობა აუკრძალა.

საგარეო საქმეთა უწყების ეს გადაწყვეტილება პირველი საპასუხო ნაბიჯია აშშ-ს სენატისა და კონგრესის მიერ შემუშავებულ და მხარდაჭერილ კანონპროექტზე. კანონპროექტი რუსეთის მიმართ დაწესებულ სანქციებს კიდევ უფრო ამკაცრებს, აფართოებს და შეუძლებელს ხდის მის გაუქმებას სენატისა და კონგრესის თანხმობის გარეშე.