აშშ-ს პრეზიდენტმა, ჯო ბაიდენმა უკრაინისთვის დამატებითი სამხედრო დახმარების გამოყოფის შესახებ განცხადება გაავრცელა.

განცხადებაში აღნიშნულია, რომ მომდევნო თვეებში აშშ უკრაინას, დახმარების სახით, თითქმის 8 მილიარდ დოლარს გამოუყოფს.

"დღეს მე ვაცხადებ უკრაინისთვის უსაფრთხოების დახმარების მკვეთრ გაზრდას და დამატებით ზომებს, რომლებიც უკრაინას ომში გამარჯვებაში დაეხმარება". — წერია თეთრი სახლის მიერ გამოქვეყნებულ განცხადებაში.

ბაიდენმა აშშ-ს თავდაცვის სამინისტროს სამინისტროს დაავალა, სრულად გამოუყოს კიევს ის თანხები, რომლებიც მისი პრეზიდენტობის ამოწურვამდე უკრაინის სამხედრო დახმარებისთვის იყო გაწერილი.

ბაიდენის გადაწყვეტილებით, შეიარაღების შემცირების შესახებ პრეზიდენტის უფლებამოსილების ფარგლებში, 5.5 მილიარდი დოლარი გამოიყოფა, რათა "ეს უფლებამოსილება იყოს უვადო და ვაშინგტონმა სრულად შეძლოს იმ სახსრების გამოყენება, რომელიც კონგრესმა გამოყო უკრაინის დასახმარებლად, აშშ-ს შეიარაღების შესამცირებლად და შემდგომში ამ მარაგის შესავსებად".

ამასთან, აშშ-ს თავდაცვის სამინისტრო, უკრაინის უსაფრთხოების დახმარების ინიციატივის ფარგლებში, დამატებით 2.4 მილიარდ დოლარს გამოყოფს, რაც უკრაინას მოამარაგებს "საჰაერო თავდაცვის საშუალებებით, უპილოტო საავიაციო სისტემებითა და საბრძოლო მასალით, ასევე გააძლიერებს უკრაინის სამხედრო-სამრეწველო ბაზას და დაეხმარება ტექნიკური მომსახურებისა და მხარდაჭერის საჭიროებებში".

გარდა ამისა, განცხადებაში აღნიშნულია, რომ უკრაინას შორ მანძილზე დარტყმების პოტენციალის გაძლიერების ფარგლებში გადაეცემა ფრთოსანი საავიაციო ბომბები, ხოლო საჰაერო თავდაცვის გასაძლიერებლად დამატებითი Patriot-ის ტიპის საზენიტო-სარაკეტო კომპლექსები.

ასევე, ბაიდენის დავალებით პენტაგონი გააფართოებს უკრაინელი პილოტების წვრთნას F-16-ის ტიპის ავაიაგამანადგურებლების მართვაში და მომდევნო წელს მომზადება გაივლის დამატებით 18 უკრაინელი პილოტი.