ოკუპირებული აფხაზეთის ე.წ. პარლამენტმა სასამართლო გადაწყვეტილებების ურთიერთ აღიარების შესახებ რუსეთ-აფხაზურ შეთანხმებას მოაწერა ხელი. ამის შესახებ ინფორმაციას აფხაზური მედია ავრცელებს.

მათი ცნობით, ოკუპირებული აფხაზეთის დეპუტატებმა რატიფიცირება მოახდინეს აფხაზეთის რესპუბლიკასა და რუსეთის ფედერაციას შორის შეთანხმებას ეკონომიკურ საკითხებში სასამართლო და საარბიტრაჟო გადაწყვეტილებების აღიარებისა და აღსრულების შესახებ.

შეგახსენებთ, რომ აღნიშნული კანონი ერთ-ერთია სამიდან, რომლის მიღებასაც რუსეთი ოკუპირებული აფხაზეთის ხელისუფლებას სთხოვდა.

შეთანხმება მიზნად ისახავს იმ სასამართლო გადაწყვეტილებების და საერთაშორისო კომერციული არბიტრაჟების ურთიერთ აღიარებასა და აღსრულებას, რომლებიც კანონიერ ძალაში შევიდა ბიზნესისა და სხვა ეკონომიკური საქმიანობის დროს წარმოშობილ დავებში.

შეთანხმება ძალაში შედის დიპლომატიური არხებით ბოლო წერილობითი შეტყობინების მიღების დღიდან 30 დღეში.

ამას გარდა, მოსკოვი სოხუმისგან ითხოვს:

1. რუსეთის იურიდიული პირების მიერ აფხაზეთის ტერიტორიაზე საინვესტიციო პროექტების განხორციელების შესახებ შეთანხმების ძალაში შესვლას;

2. რუს ინვესტორებისთვის შეზღუდვების მოხსნას კომერციული უძრავი ქონების ბაზარზე. ეს უკანასკნელი საზოგადოებაში ე.წ. "აპარტამენტების" კანონითა ცნობილი.

შეგახსენებთ, რომ მიმდინარე წლის 3 სექტემბერს ოკუპირებული აფხაზეთის თვითგამოცხადებული რესპუბლიკის ე.წ. საგარეო საქმეთა სამინისტროს ხელმძღვანელმა, სერგეი შამბამ დაადასტურა, რომ რუსეთმა აფხაზეთს დაფინანსება მიმდინარე წლის 1 სექტემბრიდან შეუჩერა და აფხაზურ მხარეს გარკვეული ვალდებულებების შესრულება მოსთხოვა.

სერგეი შამბა აცხადებდა, რომ "აღებული ვალდებულებების შეუსრულებლობამ გარკვეული სანქციები შეიძლება გამოიწვიოს“.

"ისინი 1-ლი სექტემბრიდან უკვე ამოქმედდება. მოგეხსენებათ, გარკვეული სოციალური დაფინანსება უკვე შეჩერებულია, რაც ეხება ექიმებს, მასწავლებლებს, ძალოვან სტრუქტურებს და სხვა. ეს აშკარად პირველი ნაბიჯებია. გარდა ამისა, დგას საკითხი, რომ ელექტროენერგიის იმ ნაკადში, რომელსაც ყოველ ზამთარში ვიღებთ, კომერციული ფასი უნდა გადავიხადოთ", — განაცხადა შამბამ ბრიფინგზე.

ასევე იხილეთ:

რა ხდება რუსეთსა და ოკუპირებულ აფხაზეთს შორის — ინტერვიუ კონფლიქტოლოგ ბადრი ბელქანიასთან