დღეს 20:00 საათზე პრეზიდენტი, სალომე ზურაბიშვილი ბრიფინგს გამართავს. დღეს დილით, პრეზიდენტის ადმინისტრაციამ გაავრცელა ინფორმაცია, რომ ბრიფინგი 17:00 საათზე გაიმართებოდა. თუმცა, მოგვიანებით, დრო შეიცვალა.

ბრიფინგის თემა, სავარაუდოდ, გიორგი გახარიასა და ძლიერი საქართველოს კოალიციის შესაძლო გაერთიანებაა. ცოტა ხნის წინ ტელეკომპანია მთავარმა გაავრცელა ინფორმაცია იმის შესახებ, რომ პარტია გახარია საქართველოსთვის ლიდერმა, გიორგი გახარიამ ხელი მოაწერა საქართველოს პრეზიდენტის ინიციატივით შექმნილ "ქართულ ქარტიას". არაოფიციალური ცნობით, პარტია საქართველოსთვის თავმჯდომარე ორბელიანების სასახლეში დღეს დილით იმყოფებოდა. თუმცა, ყოფილი პრემიერის გუნდში ინფორმაცია ოფიციალურად ჯერ არ დაუდასტურებიათ.

შეგახსენებთ, "ქართული ქარტია" პრეზიდენტმა საზოგადოებას 26 მაისს გააცნო. დოკუმენტზე ხელმომწერები იღებენ ვალდებულებას, არჩევნების შემდეგ, პარლამენტში შესვლის შემთხვევაში, გაატარონ ევროინტეგრაციისთვის სასიცოცხლოდ აუცილებელი რეფორმები, მათ შორის სასამართლო რეფორმა, გააუქმონ რუსული კანონები, რის შემდეგაც ხალხის მიერ მინიჭებულ მანდატს დააბრუნებენ და ქვეყანაში ვადამდელი არჩევნები ჩატარდება.

16 სექტემბერს სალომე ზურაბიშვილმა ორბელიანების სასახლეში ბრიფინგი გამართა და გიორგი გახარიას და მამუკა ხაზარაძის პარტიები ორბელიანების სასახლეში მოლაპარაკებებისთვის მოიწვია. პრეზიდენტის რეზიდენციაში ორდღიანი და რამდენიმერაუნდიანი შეხვედრების შემდეგ, გახარია და ხაზარაძე ვერ შეთანხმდნენ და გახარიას პარტიის და ხაზარაძის კოალიციის გაერთიანება ვერ მოხერხდა.