დღეს, 20:00 საათზე პარლამენტის წინ შუქრუთელების სოლიდარობის აქცია გაიმართება.

ჭიათურის სოფელ შუქრუთის მოსახლეობის ნაწილი 190 დღეზე მეტია უწყვეტ რეჯიმში აპროტესტებს ჯორჯიან მანგანეზის საქმიანობას.

აქციის მონაწილეებმა პროტესტის უკიდურეს ფორმას, შიმშილს და პირის ამოკერვას მიმართეს.

ამ ეტაპზე, 20 დღეზე მეტია რამდენიმე ადამიანი შიმშილობს, ხოლო 5-ს პირი აქვს ამოკერილი.

შუქრუთელები პარლამენტთან პროტესტის გასამართად 11 სექტემბერს ჩამოვიდნენ. ისინი ღამესაც აქციის მიმდებარე ტერიტორიაზე ათევენ.

უამინდობის მიუხედავად, პოლიციამ შუქრუთის მოსახლეობას, პარლამენტის წინ კარვის გაშლის უფლება არ მისცა.

ცნობისთვის, მოსახლეობა "ჯორჯიან მანგანეზის" საქმიანობის შედეგად გარემოსა და საცხოვრებელ სახლებზე მიყენებულ ზიანს აპროტესტებს. ადგილობრივები აღნიშნავენ, რომ კომპანიის მიერ მადნის ღია კარიერული მოპოვების შედეგად, მნიშვნელოვანი ზიანი მიადგა გარემოს, დაზიანდა საცხოვრებელი სახლები, ეკლესია და სასაფლაოები.

აქციის მონაწილეები მოითხოვენ, რომ კომპანიამ შეასრულოს ვალდებულებები, რომელიც 2021 წლის შეთანხმებით აქვს აღებული. კერძოდ, პროტესტის მონაწილეები მაღაროების მუშაობის გაჩერებასა და კომპენსაციების გაცემას მოითხოვენ.


გაიგეთ მეტი ამ თემაზე: