რუსეთის მიერ ოკუპირებული აფხაზეთის ე.წ. პრეზიდენტი, ასლან ბჟანია აფხაზებს ურჩევს, რომ საქართველოს ხელისუფლების მიერ შემოღებული „ნეიტრალური პასპორტები“ არ აიღონ.

ეხო კავკაზას ცნობით, ინტერვიუში, რომელიც აფხაზური ტელევიზიის ეთერში 19 სექტემბერს, საღამოს გავიდა, ბჟანიამ თქვა, რომ ძალიან გააკვირვა ადგილობრივი პარლამენტის ყოფილი დეპუტატის, ლეონიდ ჩამაგუას განცხადებამ, რომ აფხაზებმა ნეიტრალური პასპორტებით უნდა ისარგებლონ, ასეთი პასპორტებით სარგებლობენ რუსი სპორტსმენები ოლიმპიადებზე მონაწილეობისას და ამის გამო მათ რუსეთის მოქალაქეობას არავინ ართმევს.

მან ინტერვიუში ისიც თქვა, რომ ქართული ოცნების წინასაარჩევნო დაპირება, რომ საკონსტიტუციო უმრავლესობის მიღების შემთხვევაში საქართველოს გააერთიანებენ, არ არის რეალისტური — "აფხაზ საზოგადოებას რომ საქართველოსთან ერთიანობა სურდეს, ვერანაირი მოსკოვი და რუსი პოლიტიკოსები ვერ შეაჩერებდნენ".

მისთვის გაუგებარია, რატომ არ უნდა გამოიყენონ "გაეროს მიერ შეთავაზებული" ნეიტრალური პასპორტები, თუ მაგალითად, ადამიანს მძიმედ დაავადებული ნათესავი ჰყავს და სასიცოცხლოდ მნიშვნელოვანია საზღვარგარეთ სამკურნალოდ გამგზავრება.

რადიო თავისუფლება წერს, რომ ასლან ბჟანია "ნეიტრალური პასპორტების" მიღების ვერანაირ საჭიროებას ვერ ხედავს.

ბჟანიას თქმით, ამ პასპორტების იდეა საქართველოს ხელისუფლებას ეკუთვნის და წარმოადგენს თბილისის მიერ ოკუპირებულად წოდებული აფხაზეთის რეინტეგრაციის პროგრამის ნაწილს.

„მე არავის ვურჩევ ნეიტრალური პასპორტების აღებას. ჩვენ გვაქვს ჩვენი, აფხაზური პასპორტები. გვაქვს ჩვენი მოკავშირის(რუსეთის) პასპორტები და ეს სრულიად საკმარისია“, — აცხადებს ბჟანია.