მაღალი ალბათობით, მომავალ კვირას აშშ-ის ვიცეპრეზიდენტი და დემოკრატიული პარტიის პრეზიდენტობის კანდიდატი, კამალა ჰარისი ვაშინგტონში ვოლოდიმირ ზელენსკის შეხვდება.

სავარაუდოდ, საუბრის მთავარი საკითხი უკრაინაში მიმდინარე რუსეთის მიერ წარმოებული ომი და უკრაინის მიმართ აშშ-ის დახმარება იქნება.

გუშინ, ჟურნალისტებთან საუბრისას აშშ-ის ეროვნული უსაფრთხოების საბჭოს სპიკერმა ჯონ კირბიმაც აღნიშნა, რომ როგორც კი გაჩნდება შესაძლებლობა ჰარისი და ზელენსკი აუცილებლად შეხვდებიან ერთმანეთს.

"ვიცი, რომ ის რამდენჯერმე პირისპირ შეხვდა პრეზიდენტ ზელენსკის და ასევე ვიცი, რომ ტელეფონითაც გაესაუბრა. ეჭვი არ მეპარება, რომ მათ შორის საუბარი შედგება, თუ ამის შესაძლებლობა გაჩნდა" — განაცხადა კირბიმ