მმართველი პარტიის ქართული ოცნების თბილისის მერობის კანდიდატი, კახა კალაძე ქალაქში პარკირების პრობლემის გადაჭრისთვის, მიიჩნევს, რომ სწორი მოდელია, როდესაც პარკირების მენეჯმენტს ადგილობრივი ხელისუფლება ახორციელებს:

"ასეთ შემთხვევაში გათვალისწინებული იქნება მძღოლებისა და ფეხით მოსიარულეების ინტერესები და სათანადოდ იქნება დაცული მათი უფლებები. თბილისელების მიერ გადახდილი თითოეული თეთრი ვინმეს ჯიბეში კი არ წავა, არამედ პირდაპირ იქნება მიმართული ქალაქის ბიუჯეტში, პირდაპირ მოხმარდება პარკირების პროექტების განხორციელებას".

კალაძის თქმით, წლების წინ გაფორმდა არასწორი ვალდებულებებით დატვირთული ხელშეკრულება, რამაც თბილისელებს მოუტანა ძალიან ბევრი ჯარიმა და ნაკლები ადგილი პარკირებისთვის:

"თბილისის საცობის ერთ-ერთი მიზეზი არასწორი ქაოტური პარკირება და შესაბამისად ქაოტური ინფრასტრუქტურაა. პარკინგის მართვა ეს არ არის კონკრეტული ადგილების შემოხაზვა თეთრი საღებავით და არც თუნდაც ჯარიმების გამოწერა. რაც უფრო ნაკლები მანქანის გასაჩერებელი ადგილი იქნება ქალაქში, მით უფრო მეტ ჯარიმას გამოწერს კერძო კომპანია. ეს შეიძლება ითქვას, რომ არის ინტერესთა კონფლიქტი".

კალაძე, "შეუსწავლელ პოპულისტურ ვერსიას" უწოდებს ახალი კომპანიის შემოსვლასა და ბიუჯეტიდან სხვა კომპანიის გასტუმრებას და ფიქრობს, რომ ეს ნაბიჯი უფრო დააწვება მოქალაქეების ჯიბეს.