რუსული კანონის წინააღმდეგ აქციაზე დაკავებულმა ფრიდონ ბუბუტეიშვილმა 17 სექტემბერს გამართულ სასამართლოს სხდომაზე განაცხადა, რომ პარლამენტთან ჭიშკარი გიორგი ვაშაძის დაკვეთით დააზიანა. მისი თქმით, ვაშაძე აქეზებდა ამ ქმედებისკენ და აიმედებდა, რომ მის გვერდით იყო.

პროკურატურა ბუბუტეიშვილს პარლამენტის ჭიშკრის დაზიანებას და მეხანძრე-მაშველისთვის ქვის სროლას ედავება. ბუბუტეიშვილისთვის წარდგენილი ეს მუხლი 4-დან 7 წლამდე თავისუფლების აღკვეთას ითვალისწინებს.

"ეს ყველაფერი გავაკეთე გიორგი ვაშაძის დაკვეთით. მან მითხრა, ისროლე და თუ რამეა, მე აქ ვარ და გაგიყვანო. ფაქტი სახეზეა, არც გავყავარ და…", – განაცხადა ბუბუტეიშვილმა.

ბუბუტეიშვილმა პროცესზე უკმაყოფილება გამოთქვა ადვოკატის მიმართ, რადგან მას მოლოდინი ჰქონდა, რომ გაათავისუფლებდნენ.

"ორი თვეა, სამი თვეა მეუბნები, არ აღიარო, ჩვენ ვეცდებით ყველანაირად, გაგიყვანოთ… ფაქტი სახეზეა, 5 თვეა უკვე ვიმყოფები ციხეში… არც ვაშაძეა, ყურადღებასაც არ მაქცევს და არც არავინ და რა ვიცი… დაკვეთით გავაკეთე ეს ყველაფერი, გეუბნებით და "დალშე" თქვენ იცით", — განაცხადა ბუბუტეიშვილმა პროცესზე.