რუსეთის ფედერაციის საბჭოს საერთაშორისო ურთიერთობების კომიტეტის თავმჯდომარე გრიკორი კარასინი ამბობს, რომ ქართული ოცნების საპატიო თავმჯდომარის, ბიძინა ივანიშვილის მოულოდნელ ტონს და ნათქვამს სამხრეთ ოსეთთან ურთიერთობებში ახალი ატმოსფეროს შექმნის შანსის შესახებ და მასთან ერთად, სხვა ქართველი პოლიტიკოსების განცხადებებს, მთელ მსოფლიოში დიდი ინტერესი მოჰყვა.

კარასინის თქმით, ბოლო 16 წლის განმავლობაში, საქართველო პოლიტიკურად "დაღვინდა".

"სულ უფრო იზრდება იმის გაგება, რომ 2008 წელს სააკაშვილის ავანტიურის შემდეგ მტრობამ და დაპირისპირებამ ადგილი უნდა დაუთმოს გონიერებას და სტაბილურობას. ბოლო 16 წლის განმავლობაში საქართველო პოლიტიკურად დაღვინდა. ბევრისთვის ცხადი გახდა მუდმივი დაპირისპირების ამაოება“ — წერს კარასინი Telegram-ზე.

კარასინის თქმით, წინასაარჩევნო პერიოდში, როგორც მოსალოდნელი იყო, სკანდალური ემოციების აფეთქება გამოიწვია "ფოკუს ჯგუფებში", რომელთაც საკუთარ ქვეყანაში, არ მოსწონთ პოლიტიკური პროცესების მშვიდი განვითარება.

„საქართველოს პარლამენტის მოახლოებული არჩევნების წინა დღეებში სიტუაციის გამწვავება ასევე ხელს აძლევს მათ მსოფლიოში, ვინც საქართველოსა და რეგიონში დესტაბილიზაციაში საკუთარ სტრატეგიულ ინტერესს ხედავს“ — წერს კარასინი.

ცნობისთვის, ქართული ოცნების საპატიო თავმჯდომარემ, ბიძინა ივანიშვილმა 14 სექტემბერს, გორში, სიტყვით გამოსვლისას განაცხადა, რომ "ბოდიში უნდა მოვიხადოთ" იმის გამო, რომ ნაციონალურმა მოძრაობამ 2008 წელს ცეცხლის ალში გაახვია ჩვენი ოსი დები და ძმები.