გუშინ MTV-ს ყოველწლიური ვიდეო მუსიკალური დაჯილდოება, VMA გაიმართა, რომელიც მუსიკის ინდუსტრიაში ერთ-ერთი უმნიშვნელოვანესი ცერემონიაა, აქ ჯილდოს მოპოვება კი ყველა არტისტისთვის სასურველი პატივი.

დაჯილდოებაზე სუპერვარსკვლავი ტეილორ სვიფტი, რომელსაც წელს კარიერის განმავლობაში ყველაზე წარმატებული წელი ჰქონდა და მრავალმილიონიანი მსოფლიო ტურიც ჩაატარა, 12 ნომინაციაში იყო წარდგენილი, რომელთაგან 7-ში გაიმარჯვა კიდეც.

წლევანდელი წარმატებების შედეგად, ტეილორი ყველაზე მეტიVMA-ს მფლობელი მუსიკოსი გახდა — მას უკვე 30 ჯილდო აქვს, რაც ბიონსეს მიერ დამყარებულ რეკორდზე 4-ით მეტია.

ფოტო: Getty Images

სამადლობელ სიტყვაში სვიფტმა მადლობა თავის შეყვარებულს, ამერიკული ფეხბურთის ვარსკვლავს, ტრევის კელსის გადაუხადა და თქვა, რომ როცა ახალი ალბომის მუსიკალურ ვიდეოებს იღებდა, კელსი მთელი ძალისხმევით ამხნევებდა და გვერდში ედგა, რაც მას "არასდროს დაავიწყდება."

ამასთან ერთად, სვიფტმა სიტყვის ბოლოს ამერიკელ ამომრჩევლებს არჩევნებში მონაწილეობისკენ მოუწოდა — "თუ სრულწლოვნები ხართ, გთხოვთ, დარეგისტრირდით ხმის მისაცემად. ეს ძალიან მნიშვნელოვანი არჩევნებია."

ცნობისთვის, რამდენიმე დღის წინ ტეილორ სვიფტმა ინსტაგრამზე კამალა ჰარისს მხარდაჭერა გამოუცხადა და პოლიტიკური განცხადება გამოაქვეყნა.