ირლანდიელმა მომღერალმა და კომპოზიტორმა შინეიდ ო'კონორმა ფეისბუკზე ემოციური ვიდეო გამოაქვეყნა, რომელშიც ამბობს, რომ თვითმკვლელობაზე ისევ ფიქრობს და ოჯახის წევრებს მოუწოდებს, მალე დაეკონტაქტონ.

50 წლის მუსიკოსი ნიუ-ჯერსიში მარტო ცხოვრობს. მისი თქმით, სამი სხვადასხვა ფსიქიკური აშლილობა აქვს და ამის გამო ოჯახმა მიატოვა და უკვე 2 წელია მარტოა.

"უეცრად, ადამიანები, რომლებსაც უნდა ყვარებოდი და შენზე უნდა ეზრუნათ, ისე გექცევიან, როგორც არარაობას. მე ჩემი შვილების ადგილზე დედასთან წავიდოდი", ამბობს ვიდეოში.

ო'კონორი ამბობს, რომ მისი ვიდეო შესაძლოა ვინმეს დაეხმაროს, თუმცა არა მას.

"ვიცი რომ მე მილიონობით ადამიანიდან მხოლოდ ერთი ვარ", დასძენს მომღერალი.

მოგვიანებით მის ფეისბუკზე ახალი პოსტი გამოჩნდა:

"მე შინეიდის თხოვნით ვპოსტავ, რომ ყველამ, ვისაც ის უყვარს, იცოდეს, რომ უსაფრთხოდაა და თვითმკვლელობაზე არ ფიქრობს. ის გარშემორტყმულია სიყვარულით და მზრუნველი ადამიანებით".

1 წლის წინ, შინეიდ ო'კონორი ილინოიში დაიკარგა, თუმცა პოლიციამ მალე იპოვა. მოგვიანებით, მომღერალი კვლავ გაუჩინარდა და როდესაც პოლიციამ მისი ძებნა დაიწყო, მან ფეისბუკზე დაპოსტა, რომ თვითმკვლელობას არ აპირებდა.