ამერიკული ფეხბურთის მთავარი ჩემპიონატის მუსიკალურ შესვენებას მთელი წლის განმავლობაში უამრავი ადამიანი ელოდება. ეს ყოველწლიური შოუ, რომელსაც ყველაზე მოთხოვნადი და პოპულარული არტისტები დგამენ, მუსიკისა და ქორეოგრაფიის იდეალური შერწყმა და პოპ-კულტურის ერთ-ერთი მნიშვნელოვანი მომენტია.

წლევანდელ Super Bowl-ს მუსიკალურად ამერიკელი მეგავარსვლავი, რეპერი კენდრიკ ლამარი გააფორმებს. 17 გრემის მფლობელი მუსიკოსი ამერიკული ფეხბურთის მოყვარულებს და მთელ მსოფლიოს ნიუ-ორლეანში 9 თებერვალს წარუდგება.

კენდრიკ ლამარი Super Bow-ის შესვენების საკულტო სცენაზე აქამდეც მდგარა. 2022 წელს მან ჰიპ-ჰოპის ლეგენდების, დოქტორი დრეს, ემინემის, სნუპ დოგის, მერი ჯეი ბლაიჯისა და 50 ცენტის გვერდით შეასრულა მუსიკალური პერფორმანსი.

კენდრიკ ლამარმა მომავალ შოუსთან დაკავშირებით განცხადება გაავრცელა, სადაც ამბობს, რომ ეროვნული ფეხბურთის ლიგის ჩემპიონატის სცენაზე დგომას ძალიან ელოდება და "რეპი ისევ ყველაზე გავლენიანი მუსიკის ჟანრია და ვაპირებ, მსოფლიოს შევახსენო, რატომაა ასე. მათ სწორი ადამიანი შეარჩიეს."

37 წლის რეპერი სადებიუტო ალბომის, good kid, m.A.A.d city-ს გამოშვების მერე საერთაშორისო პოპულარობითა და წარმატებით გამოირჩევა. მისმა ბოლო ჰიტმა, სინგლმა Not Like Us, რომელიც რეპერი დრეიკის მიმართაა გამიზნული, მთელი ინტერნეტსივრცე მოიცვა და რეპერის სოციალური გავლენის შესახებ კიდევ ერთხელ შეგვახსენა.