საქართველოს პროკურატურის ცნობით, გერმანელ სამართალდამცავებთან თანამშრომლობით გახსნილია მორიგი ტრანსნაციონალური დანაშაული.

საქმე ეხება ე.წ ქოლ-ცენტრების სქემას, რის ფარგლებშიც ბრალდებულები თაღლითური გზით, უკანონოდ ეუფლებოდნენ ევროპელი მოსახლეობის კუთვნილ თანხებს.

პროკურატურის წარმომადგენელმა ბრიფინგზე დავით კეზერაშვილი და მისი ოჯახის წევრებიც ახსენა.

"უწყებაში ამბობენ, რომ შპს „მორგან ლიმიტედის“ სახელით მოქმედი ქოლ-ცენტრის ერთ-ერთმა ხელმძღვანელმა პირმა, რომელიც გატარებული ღონისძიების ფარგლებში მოსამართლის განჩინების საფუძველზე დაკავებულია, ევროპელი მოსახლეობისგან თანხების თაღლითურად დაუფლების პერიოდში ჯამში მილიონ დოლარზე მეტი თანხა ჩარიცხა დავით კეზერაშვილის, კეზერაშვილის დის და კეზერაშვილის დის შვილის საბანკო ანგარიშებზე."

პროკურატურის განმარტებით, თაღლითური ქოლ-ცენტრის თანამშრომლები დისტანციურად უკავშირდებოდნენ დაზარალებულებს ელექტრონულ მოწყობილობებზე, არეგისტრირებდნენ მათ სავაჭრო პლატფორმებზე, კრიპტო ბირჟებზე და დაზარალებულების თანხით შეძენილ ვირტუალურ აქტივებს რიცხავდნენ კრიმინალური ორგანიზაციის კონტროლირებად ელექტრონულ საფულეებზე. აღნიშნულის პარალელურად, ყალბ პლატფორმებზე სიმულაციური ქმედებებით დაზარალებულებს აჩვენებდნენ ინვესტირებული თანხების ზრდას, ხოლო დაბანდებული თანხისა და მოგების უკან დაბრუნების მოთხოვნის შემთხვევაში, წყვეტდნენ ყოველგვარ კომუნიკაციას.

აღნიშნული გზით, ორგანიზებული დანაშაულებრივი ჯგუფის წევრები თაღლითურად დაეუფლნენ გერმანიის ფედერაციული რესპუბლიკის, სლოვენიისა და სლოვაკეთის რესპუბლიკების მოქალაქეების კუთვნილ დაახლოებით 3 170 000 ევროს.

"პროკურატურა ბრალდებულების მიმართ აღკვეთი ღონისძიების სახით პატიმრობის შეფარდების მოთხოვნით სასამართლოს კანონით დადგენილ ვადაში მიმართავს. წარდგენილი ბრალდება სასჯელის სახედ და ზომად 9 დან 12 წლამდე თავისუფლების აღკვეთას ითვალისწინებს" — თქვა პროკურატურის წარმომადგენელმა გამართულ ბრიფინგზე

შეგახსენებთ, 1 წლის წინ BBC - მ გამოაქვეყნა ვრცელი საგამოძიებო მასალა.

ჟურნალისტურ გამოძიებაში ნაჩვენებია, რომ დავით კეზერაშვილი დაკავშირებულია "ასობით სხვადასხვა საინვესტიციო ბრენდის გლობალურ თაღლითურ ქსელთან", რომელმაც კლიენტთა მოტყუების გზით მილიარდ დოლარზე მეტი გამოიმუშავა.

საქართველოს თავდაცვის ყოფილმა მინისტრმა და ტელეკომპანია ფორმულას დამფუძნებელმა დავით კეზერაშვილმა აღნიშნული ცნობები უარჰყო და ბრიტანულ ტელეკომპანია BBC-ს საჩივრით მიმართა.

მიმდინარე წლის გაზაფხულზე, მედიაში გავრცელდა ცნობები, რომ შეერთებულმა შტატებმა დავით კეზერაშვილს ვიზა არ მისცა — იმიგრაციისა და ეროვნულობის აქტის 212 მუხლის საფუძველზე, რაც ფულის გათეთრებაზე ეჭვს გულისხმობს. კეზერაშვილმა აღნიშნული გადაწყვეტილებაც გაასაჩივრა.

ჯერჯერობით, დავით კეზერაშვილის პროკურატურის განცხადებაზე, საპასუხო კომენტარი არ გაუვრცელებია.

საქართველოს პროკურატურაში კი ამბობენ, რომ ამ მიმართულებით აქტიურად გრძელდება გამოძიება, მათ შორის უცხოელი კოლეგების ჩართულობით და შემაჯამებელი გადაწყვეტილების მიღებისთანავე, საზოგადოებას ეცნობება დამატებით.