თბილისში, დიდუბე-ავჭალის მონაკვეთზე მომხდარი სარკინიგზო შემთხვევის გამო გარდაიცვალა რკინიგზის ორი თანამშრომელი, — ამის შესახებ განცხადებას საქართველოს რკინიგზა ავრცელებს.

"დღეს, 3 სექტემბერს, თბილისში, დიდუბე-ავჭალის მონაკვეთზე მომხდარი სარკინიგზო შემთხვევის გამო გარდაიცვალა საქართველოს რკინიგზის ორი თანამშრომელი, რომლებიც გეგმიურ სამუშაოებს ასრულებდნენ. ამ დროისთვის გაჩერებულია ბათუმი-თბილისის მიმართულებით მოძრავი მატარებელი, რომლის მგზავრები არ დაშავებულან.

მომხდარის შესახებ მიმდინარეობს დეტალური მოკვლევა, ხოლო შემთხვევის ადგილზე საგამოძიებო პროცედურები, რის შემდეგაც განხორციელდება ბათუმი-თბილისის მატარებლის ტრანსპორტირება თბილისი ცენტრალის მიმართულებით.

საქართველოს რკინიგზა ღრმა მწუხარებას გამოთქვამს მომხდარი ფაქტის გამო და უსამძიმრებს თანამშრომლებსა და გარდაცვლილთა ოჯახებს." — ნათქვამია საქართველოს რკინიგზის გავრცელებულ ინფორმაციაში.

ცნობისთვის, დღეს თბილისში სარკინიგზო ხაზზე ავარია მოხდა. ბათუმიდან მომავალი მატარებელი რკინიგზის სამუშაო პლატფორმას შეეჯახა, რის შედეგადაც ორი ადამიანი გარდაიცვალა.