საქართველოს საგარეო საქმეთა სამინისტრო, თავდაცვის მინისტრი და პრემიერმინისტრი ავღანეთში, ბაგრამის ბაზასთან ქართველი ჯარისკაცის დაღუპვის გამო მწუხარებას გამოთქვამენ.

"ჩვენ ამ მძიმე წუთებში ვდგავართ დაღუპული სამხედრო მოსამსახურის ოჯახის გვერდით და გამოვხატავთ ღრმა მწუხარებას", - აცხადებს თავდაცვის მინისტრი ლევან იზორია.

"ვიზიარებ მისი ოჯახისა და ახლობლების უდიდეს ტკივილს. ეს საქართველოს, თითოეული ჩვენგანის ტკივილია, რომელსაც ვერაფერი გაანელებს" - წერს გიორგი კვირიკაშვილი.

"საქართველოს შეიარაღებული ძალების II ქვეითი ბრიგადის 23-ე ქვეითი ბატალიონის სერჟანტი ბებიაშვილი მსახურობდა ავღანეთში მტკიცე მხარდაჭერის მისიის ფარგლებში, სადაც საქართველოს, როგორც ნატო-ს მომავალ წევრს და საიმედო პარტნიორს, საკუთარი წვლილი შეაქვს საერთო ევროატლანტიკური უსაფრთხოების განმტკიცებასა და საერთაშორისო ტერორიზმის წინააღმდეგ ბრძოლაში. მისი დაღუპვა დიდი დანაკლისია საქართველოს შეიარაღებული ძალებისთვის" - ვკითხულობთ საგარეო საქმეთა სამინისტროს სამძიმრის წერილში.

გუშინ, 3 აგვისტოს, ავღანეთის ისლამურ რესპუბლიკაში, ბაგრამის საავიაციო ბაზის მიმდებარე ტერიტორიაზე ერთობლივი მოტორიზებული პატრულირებისას თავდასხმის დროს საქართველოს შეიარაღებული ძალების უმცროსი სერჟანტი, მდინარი საბას ძე ბებიაშვილი გარდაიცვალა.

ამავე თავდასხმის დროს დაშავდა სამი სამხედრო მოსამსახურე. კაპიტან მიხეილ ამირანის ძე გვირჯიშვილის ჯანმრთელობის მდგომარეობა სტაბილურად მძიმეა, დანარჩენი ორის - უფროსი ლეიტენანტ გიგა დავითის ძე ხახუტაშვილის და კაპრალ გეგა ელვარდის ძე ხარშილაძის - დამაკმაყოფილებელი.

საქართველოს შეიარაღებული ძალების წარმომადგენლები ავღანეთში "მტკიცე მისიის" ფარგლებში არიან.