აშშ მზადაა ისტორიის ახალი თავისთვის პრეზიდენტ კამალა ჰარისის სახით, აშშ მზადაა პრეზიდენტ ჰარისისთვის, — ეს განცხადება აშშ-ის ყოფილმა პრეზიდენტმა ბარაკ ობამამ ჩიკაგოში, დემოკრატიული პარტიის ეროვნულ ყრილობაზე გამოსვლისას გააკეთა.

მან მკაცრად გააკრიტიკა ტრამპის პოლიტიკა და მისი მიდგომები. ყოფილი პრეზიდენტის თქმით, რესპუბლიკელების საპრეზიდენტო კანდიდატი, დონალდ ტრამპს ძალაუფლება მხოლოდ საკუთარი მიზნების მისაღწევად სჭირდება.

"ჩვენ არ გვჭირდება კიდევ ოთხი წელი ხმაური, აურზაური და ქაოსი. ჩვენ ეს კინო უკვე ვნახეთ და ყველამ ვიცით, რომ მეორე სერია, როგორც წესი, უარესია ხოლმე. ტრამპი 78 წლის მილიარდერია, რომელიც არ წყვეტს წუწუნს თავის პრობლემებზე მას შემდეგ, რაც ცხრა წლის წინ თავის „ოქროს ესკალატორზე“ დადგა. მუდმივი ჩივილისა და უკმაყოფილების ნაკადი ახლა გააძლიერა, რადგანაც მას კამალა ჰარისთან მარცხის ეშინია.

ტრამპს ბავშვური მეტსახელები, კონსპირაციის თეორიები, მხარდამჭერების რაოდენობის უცნაური აკვიატება ახასიათებს. ამერიკა მზადაა ისტორიის ახალი ფურცლის დასაწერად. ამერიკა მზადაა ახალი ისტორიისთვის, ჩვენ მზად ვართ პრეზიდენტ კამალა ჰარისისთვის", — განაცხადა ბარაკ ობამამ.

აშშ-ის ყოფილმა პრეზიდენტმა ასევე მადლობა გადაუხადა და შეაქო ჯო ბაიდენი, რომელმაც პრეზიდენტობის კანდიდატობა კამალა ჰარისს დაუთმო.

"ჩირაღდანი გადაცემულია. ახლა ჩვენი ბრძოლის დროა ისეთი ამერიკისთვის, რომლისაც ყველა ჩვენგანს სჯერა. ეჭვი არ შეგეპაროთ, ეს იქნება ნამდვილი ბრძოლა", — თქვა ბარაკ ობამამ.

ექს-პრეზიდენტმა ასევე აღნიშნა, რომ 2024 წლის საპრეზიდენტო არჩევნებზე რთული ბრძოლა იქნება და მხარდამჭერებს არჩევნებზე მაქსიმალური ჩართულობისკენ მოუწოდა.