როგორც იტალიელები იტყვიან, მამა მია! ან როგორც ABBA-ის იმ ცნობილ სიმღერაშია... მთავარია, რომ ჩვენი საყვარელი საზაფხულო ისტორია შეიძლება გაგრძელდეს: Mamma Mia! ეკრანებზე მესამე ფილმით დაბრუნებას აპირებს.

ინფორმაციას ამის შესახებ ფილმში მონაწილე მსახიობი ქრისტინ ბარანსკი ადასტურებს. გამოცემა The Hollywood Reporter-თან ინტერვიუში ბარანსკიმ აღნიშნა, რომ ფილმების პროდიუსერ ჯუდი კრეიმერთან შეხვედრა ჰქონდა, სადაც მესამე ნაწილის სიუჟეტის დეტალებიც კი განიხილეს.

"ყველანი საბერძნეთის თუ ხორვატიის რომელიღაც შესანიშნავ კუნძულზე მოვილხენთ", — გვიმხელს ემის მფლობელი მსახიობი და აღნიშნავს, რომ კრეიმერი მე-3 ფილმის გადასაღებად უკვე ემზადება, — "მხოლოდ ამის თქმა შემიძლია. თუმცა, იმას არ ვამბობ, ნეტავ, გადაიღონ-მეთქი. ჯუდი კრეიმერი სიტყვას ასრულებს ხოლმე. ასე იყო მეორე ნაწილის შემთხვევაშიც, რომელმაც დიდ წარმატებას მიაღწია. სულ არ გამიკვირდება, ყველას რომ ისევ ერთად მოუყაროს თავი".

"ყველაში" კი ფილმების ვარსკვლავური სამსახიობო გუნდი იგულისხმება: მერილ სტრიპი, ამანდა საიფრედი, პირს ბროსნანი, ენდი გარსია, შერი...

ლეგენდარული ABBA-ის სიმღერებით გაჯერებული დაუვიწყარი საზაფხულო ისტორია, Mamma Mia!, 2008 წელს გამოვიდა ეკრანებზე და კინოგაქირავებაში დიდ წარმატებას მიაღწია. ფილმმა და მისმა 2018 წელს გამოსულმა გაგრძელებამ, Mamma Mia! Here We Go Again, ჯამში $1,1 მილიარდამდე გამოიმუშავა.

Mamma Mia! Here We Go Again (2018)

ფოტო: Universal Pictures

Mamma Mia!, რომელიც გაერთიანებული სამეფოს, აშშ-ისა და გერმანიის საერთო ნამუშევარი იყო, კეტრინ ჯონსონის ამავე სახელწოდების სასცენო მიუზიკლს ეფუძნება. მისი სიუჟეტი ახალგაზრდა სოფი შერიდანის გარშემო ვითარდება, რომელიც ზაფხულში, გამოგონილ ბერძნულ კუნძულზე ქორწილს იხდის. ქორწილში სოფი დედამისის სამ ყოფილ თაყვანისმცემელს დაპატიჟებს იმის გასარკვევად, თუ რომელია მამამისი.

კომერციულ წარმატებასთან ერთად, Mamma Mia!-მ არაერთი პრიზიც მოიპოვა, ABBA-ის უკვდავი ჰიტების ახლებურმა ვერსიებმა კი საყოველთაო მოწონება დაიმსახურა. აღსანიშნავია, შვედური პოპჯგუფის წევრები ფილმის პრემიერასაც ესწრებოდნენ სტოკჰოლმში. ამასთან, ABBA-ის ორი წევრი, ბენი ანდერსონი და ბიორნ ულვეუსი, კინოსურათშიც გამოჩნდნენ მცირე როლებით.

თუ ფილმები შენი ცხოვრების განუყოფელი ნაწილია და მათი განხილვაც გიყვარს, შემოგვიერთდი ჯგუფში ერთი ფილმიც და...