არასამთავრობო ორგანიზაცია, საქართველოს დემოკრატიული ინიციატივა საკონსტიტუციო სასამართლოს თანამშრომლის, თორნიკე ობოლაშვილის მიმართ გამოტანილ განაჩენს ეხმაურება და მოსამართლის გადაწყვეტილებას უკანონოს უწოდებს.

"ვეხმაურებით თბილისის საქალაქო სასამართლოს მოსამართლის, მანუჩარ ცაცუას მიერ საქართველოს საკონსტიტუციო სასამართლოს თანამშრომლის, თორნიკე ობოლაშვილის მიმართ 2024 წლის 14 აგვისტოს გამოტანილ უკანაონო გადაწყვეტილებას და მიგვაჩნია რომ მოსამართლე, მანუჩარ ცაცუას მიერ მიღებული გადაწყვეტილება არის საშიში პრეცედენტი და გზას უხსნის პოლიციელების თვითნებობას.

ამასთან, საგანგაშოდ მიგვაჩნია სპეციალური საგამოძიებო სამსახურის უმოქმედობა, რომელიც დანაშაულის ნიშნების არსებობის მიუხედავად ამ დრომდე არ იწყებს გამოძიებას, რაც ქვეყანაში ამკვიდრებს დაუსჯელობის სინდრომს და გზას უხსნის პოლიციელების მხრიდან მოქალაქეების მიმართ დანაშაულების ჩადენას."

[...]

"თორნიკე ობოლაშვილის მიმართ პოლიციელებმა შეადგინეს სამართალდარღვევის ოქმი, სადაც მიუთითეს, თითქოს იგი არ ემორჩილებოდა პოლიციელების კანონიერ მოთხოვნა და შეურაცხყოფას აყენებდა მათ. აღსანიშნავია რომ სასამართლო პროცესზე შსს-ს არცერთი ობიექტური და ნეიტრალური მტკიცებულება არ წარმოუდგენია, რომელიც დაადასტურებდა თორნიკე ობოლაშვილის მხრიდან სამართალდარღვევის ჩადენას." — წერია განცხადებაში

საკონსტიტუციო სასამართლოს თანამშრომლის, თორნიკე ობოლაშვილის ინტერესებს საქართველოს დემოკრატიული ინიციატივა (GDI) იცავს

17 ივლისს თორნიკე ობოლაშვილმა, Facebook-ზე ვრცელი პოსტი გამოაქვეყნა, მან პოლიციელი უფლებამოსილების გადამეტებაში და ფიზიკურ ძალადობაში დაადანაშაულა.

ობოლაშვილის თქმით, სამოქალაქო ტანსაცმელში გამოწყობილმა ორმა პოლიციელმა ის ქუჩაში გააჩერა და განუმარტა, რომ მისი იდენტიფიცირება სურდათ. როგორც ის ჰყვება, ერთ-ერთმა პოლიციელმა უთხრა, რომ ზედაპირულად უნდა შეემოწმებინათ, რაზეც დათანხმდა, ამის შემდეგ კი ჩანთის გახსნა მოსთხოვეს.

ობოლაშვილი აღნიშნავს, რომ უარის მიღების შემდეგ, მას ფიზიკური და სიტყვიერი შეურაცხყოფა მიაყენეს.

იგი ასევე იხსენებს განყოფილებაში ყოფნის პერიოდსაც და ჰყვება, რომ პოლიციელებს მის მიმართ "აგდებული" დამოკიდებულება ჰქონდათ და კვლავ ითხოვდნენ ჩანთის გახსნას.

ობოლაშვილი აღნიშნულ პოსტში წერს იმასაც, რომ არ მისცეს ადვოკატთან დარეკვის უფლება, ხოლო ტელეფონი მას შემდეგ წაართვეს, რაც ადვოკატთან დარეკვის უფლება მიიღო და მობილურ ტელეფონზე ბლოკი მოხსნა.