სპეციალურმა საგამოძიებო სამსახურმა, უცხო ქვეყნის მოქალაქე, პირადი ცხოვრების საიდუმლოს ხელყოფის ბრალდებით დააკავა.

გამოძიებით დადგინდა, რომ 24 წლის საქართველოს მოქალაქემ, 45 წლის თურქეთის მოქალაქე მამაკაცი სოციალური ქსელის საშუალებით გაიცნო, რის შედეგადაც სასიყვარულო და ინტიმური სახის ურთიერთობა ჩამოუყალიბდათ.

დაზარალებულთან სქესობრივი კავშირის დროს, ბრალდებული მამაკაცი ფარულად, მობილური ტელეფონით ვიდეოს უღებდა, ასევე, მისი ტელეფონიდან ფარულად გადაიწერა პირადი ცხოვრების ინტიმური შინაარსის ფოტო-მასალა.

ბრალდებულმა ქალის შანტაჟი, ურთიერთობის გაწყვეტის შემდეგ დაიწყო და ახალგაზრდა ქალს ურთიერთობის აღდგენას სთხოვდა. უარის მიღების შემდეგ შურისძიების მიზნით, მამაკაცმა ქალის ოჯახის წევრებთან და ნაცნობებთან ინტიმური კადრები გაავრცელა.

გარდა ამისა, ბრალდებულმა სოციალური ქსელში — Facebook, instagram სხვადასხვა ყალბი ანგარიში შექმნა და ფარული კადრები საჯაროდაც განათავსა.

ასევე, უცნობ პირებს, დაზარალებულის სახელით სწერდა და მის საკონტაქტო ინფორმაციას აწვდიდა, უგზავნიდა ინტიმურ ფაილებს, რის შედეგადაც მას უკავშირდებოდნენ მისთვის უცნობი მამაკაცები.

სპეციალურმა საგამოძიებო სამსახურმა კონფიდენციალურობის სრული დაცვით, საგამოძიებო ქმედებების და ჩხრეკის შედეგად, თურქეთის მოქალაქის სასტუმრო ნომერში ქალის ინტიმური ფოტო-ვიდეო მასალა ამოიღო, ასევე, აღმოაჩინა სოციალური ქსელის ანგარიშები, რომელსაც იგი ქალის პირადი ცხოვრების გასავრცელებლად იყენებდა.

მამაგაცი დაკავებულია სისხლის სამართლის კოდექსის 157 პრიმა მუხლით გათვალისწინებული დანაშაულისთვის, რაც 8 წლამდე თავისუფლების აღკვეთას ითვალისწინებს.

საქმეზე გამოძიება გრძელდება.