ცივი ომის შემდეგ დასავლეთსა და რუსეთს შორის პატიმრების ყველაზე დიდი გაცვლა შედგა, 26 დაკავებული თურქეთში, ქალაქ ანკარაში გუშინ ღამით გათავისუფლდა. მოლაპარაკებებში ამერიკის შეერთებული შტატები, გერმანია, რამდენიმე დასავლური ქვეყანა და რუსეთი მონაწილეობდნენ.

თურქეთის ეროვნული სადაზვერვო სააგენტოს ცნობით, გაცვლის ფარგლებში გათავისუფლდნენ ზელიმხან ხანგოშვილის მკვლელობისთვის გერმანიაში გასამართლებული, ვადიმ კრასიკოვი, რუსი ოპოზიციონერი - კარა-მურზა და Wall Street Journal-ის რეპორტიორი ევან გერშკოვიჩი.

ვინ გაცვალა რუსეთმა?

  • Wall Street Journal-ის რეპორტიორი — ევან გერშკოვიჩი
  • რუსი ოპოზიციონერი პოლიტიკოსი — ვლადიმერ კარა-მურზა
  • ნავალნის ყოფილი თანამოაზრე — ლილია ჩანიშევა
  • რუსი ოპოზიციონერი — ილია იაშინი
  • ნავალნის ყოფილი თანამოაზრე — ქსენია ფადეევა
  • რუსი ოპოზიციონერი პოლიტიკოსი — ანდრეი პივოვაროვი
  • ამერიკელი საზღვაო ქვეითი — პოლ უელანი
  • აშშ-რუსეთის ორმაგი მოქალაქე და ჟურნალისტი — ალსუ კურმაშევა
  • ორგანიზაცია "მემორიალის" თანადამფუძნებელი — ოლეგ ორლოვი
  • მხატვარი — საშა სკოჩილენკო
  • პოლიტოლოგი — დემური ვორონინი
  • გერმანიისა და რუსეთის ორმაგი მოქალაქე — კევინ ლიკი
  • გერმანიის მოქალაქე — რიკო კრიგერი (დაპატიმრებული ბელორუსიაში)
  • გერმანიის მოქალაქე — პატრიკ შობელი
  • გერმანელი იურისტი და აქტივისტი — ჰერმან მოიზჰესი
  • ნავალნის ყოფილი თანამოაზრე — ვადიმ ოსტანინი

სანაცვლოდ რუსეთის ხელისუფლებამ რვა პატიმარი მიიღო:

  • FSB-ს ყოფილი ოფიცერი — ვადიმ კრასიკოვი (გერმანიიდან)
  • მსჯავრდებული — არტემ დულცევი (სლოვენიიდან)
  • მსჯავრდებული — ანა დულცევა (სლოვენიიდან)
  • სავარაუდო ჯაშუში — მიხაილ მიკუშინი (ნორვეგიიდან)
  • სავარაუდო ჯაშუში — პაველ რუბცოვი (პოლონეთიდან)
  • რომან სელეზნევი (აშშ)
  • ჰაკერი — ვლადისლავ კლიუშინი (აშშ)
  • FSB-ს სავარაუდო აგენტი — ვადიმ კონოშჩენოკი (აშშ)

რუსეთში გათავისუფლებული პატიმრები გვიან ღამით დაბრუნდნენ, მათ მოსკოვის ვნუკოვოს აეროპორტში რუსეთის პრეზიდენტი, ვლადიმერ პუტინი დახვდა. პუტინმა ყველა მათგანი შეიწყალა და სახელმწიფო პრემიით დააჯილდოვა.

ამავე თემაზე: ზელიმხან ხანგოშვილის მკვლელი პუტინისგან სახელმწიფო ჯილდოს მიიღებს