იტალიელმა მხტომელმა, ჯანმარკო ტამბერიმ ინსტაგრამზე გულისამაჩუყებელი ბოდიშის წერილი დაუწერა ცოლს მას შემდეგ, რაც საქორწინო ბეჭედი პარიზის ოლიმპიადის გახსნის ცერემონიაზე დაკარგა.

32 წლის მსოფლიო ჩემპიონი იტალიის დროშას იქნევდა მდინარე სენაზე, როცა თითიდან ბეჭედი მოსძვრა და მდინარეში ჩაუვარდა.

"მაპატიე, ჩემო სიყვარულო, ძალიან ვწუხვარ.

ბოლო თვეებში ბევრი კილოგრამი დავიკელი, ბევრი წყალი ჩავყლაპე ან მოსალოდნელის ენთუზიაზმით ვიყავი აღსავსე. ალბათ, სამივე მიზეზის ბრალია ერთდროულად, რომ ბეჭედი მომძვრა. დავინახე, როგორ მიფრინავდა. მზერა გავაყოლე, როცა ნავის ძირზე დაეცა და ახტა. იმედი ჩამესახა, თუმცა ბეჭედი არასწორი მიმართულებით გაფრინდა და ჰაერში ათასჯერ დატრიალდა, სანამ წყალში ჩაყვინთავდა, ისე, თითქოს ის ერთადერთი ადგილი იყო, სადაც ყოფნა უნდოდა.

ეს მომენტი სამუდამოდ გაგრძელდა.

თუმცა, თუ ეს უნდა მომხდარიყო, თუ ბეჭდის დაკარგვა მეწერა, ამისთვის სენაზე უკეთესი ადგილი ვერ წარმომიდგენია. ის სამუდამოდ სიყვარულის ქალაქში დარჩება, იმ დროს გაფრენილი, როცა იტალიის დროშის მაღლა აწევას ვცდილობდი მსოფლიოს ყველაზე მნიშვნელოვანი სპორტული მოვლენის გახსნის ცერემონიაზე. მისი დაკარგვის საპატიო მიზეზის მოგონებაც რომ მეცადა, ასეთ მხატვრულს ვერაფერს მოვიფიქრებდი.

გუშინდელ შემთხვევას პოეტური მხარეც აქვს. თუ გენდომება, პარიზში ერთად ჩამოვიდეთ, შენი ბეჭედიც მდინარეში ვისროლოთ და ისინი სამუდამოდ ერთად იქნებიან, ჩვენ კი საქორწინო ფიცის გასაახლებლად კიდევ ერთი მიზეზი გვექნება და შენ როგორც გინდოდა, ახლიდან დავქორწინდებით.

დაე, ეს ამბავი სახლში უფრო დიდი ოქროთი დაბრუნების ნიშანი ყოფილიყოს!"

— დაწერა ტამბერიმ ინსტაგრამზე.