ოპოზიციონერი დეპუტატის, თეონა აქუბარდიას თქმით, დანიამ საქართველოსთან შეწყვიტა 4-წლიანი სამხედრო დახმარება, რომლის ბიუჯეტიც 71.5 მილიონი დანიური კრონა იყო.

"მინდა გაგიზიაროთ დანიის საგარეო საქმეთა სამინისტროს წერილი, ჩემს კითხვაზე, დანიის მხრიდან, მათ შორის ურთიერთობების გადახედვაზე საქართველოსთან დაკავშირებით, სადაც პირდაპირ წერია, რომ დანიამ საქართველოსთან ევროკომისიის გადაწყვეტილების, შემდგომ დაიწყო ორმხრივი ურთიერთობების გადახედვა და შეაჩერა საქართველოს მთავრობასთან დაგეგმილი რიგი აქტივობები და ახალი პროგრამების მხარდაჭერა", — განაცხადა აქუბარდიამ დღეს, 30 ივლისს, მედიასთან.

დეპუტატის თქმით, დანია მოუწოდებს საქართველოს მთავრობას დაუბრუნდეს ევროატლანტიკურ გზას, დაიცვას ევროკავშირის რეფორმების დღის წესრიგი, რაც არის ძლიერი ორმხრივი კავშირების საფუძველი დანიასა და საქართველოს შორის:

"რუსული კანონის შედეგად, ჩვენ ვნახეთ ყველაზე მძიმე შედეგი ჩვენი თავდაცვისუნარიანობისთვის, როდესაც შეერთებული შტატების შემდგომ, როდესაც გაუქმდა ეს მნიშვნელოვანი სამხედრო სწავლება. 30 მილიონი ევროკავშირმა გაყინა, ჩვენი შეიარაღებული ძალებისთვის და დღემდე, მე თავდაცვის მინისტრისგან, ამასთან დაკავშირებით პასუხი არ მიმიღია".

ამ თემაზე: ევროკავშირმა გაყინა 30 მლნ ევროს დახმარება, რომელიც საქართველოს თავდაცვის სფეროსთვის იყო გამოყოფილი

ასევე, ნახეთ: "ეს პასუხია ოცნების ანტიდასავლურ რიტორიკასა და ქმედებებზე" — პრეზიდენტი ევროკავშირის გადაწყვეტილებაზე 30 მლნ-ის გაყინვასთან დაკავშირებით