საქართველოში foodpanda-ს სერვისით ვეღარ ისარგებლებთ. foodpanda-ს ვებგვერდზე შესვლისას თქვენ ავტომატურად menu.ge-ზე აღმოჩნდებით.

menu.ge-ს წარმომადგენელი On.ge-სთან ამ ეტაპზე აღნიშნულ საკითხზე არ საუბრობს. კომპანიაში ამბობენ, რომ ისინი თვითონ დაგვიკავშირდებიან.

Menu Group-ის ერთ-ერთი მმართველი, სტეპან ალსანიანი marketer-თან საუბრისას ამბობს, რომ კომპანიებს შორის სავაჭრო გარიგება დაიდო, რის შესახებ განცხადებაც მოგვიანებით გავრცელდება. foodpanda-ს დირექტორის თქმით, კომპანია ოფიციალურ განცხადებას საკითხთან დაკავშირებით დღის განმავლობაში გაავრცელებს.

foodpanda ქალაქ ბერლინში 2012 წელს დაარსდა, კომპანია ვებგვერდისა და მობილური აპლიკაციის საშუალებით სხვადასხვა კვების ობიექტებიდან საკვების მიწოდების სერვისს სთავაზობდა მომხმარებელს. მისი სერვისით სარგებლობა საქართველოში 2014 წლიდანაა ხელმისაწვდომი. ის 23 ქვეყანაში ოპერირებს. 2014 წელს კომპანიაში ამერიკულმა საინვესტიციო ბანკმა გოლდმენ საქმა 110 მილიონი დოლარის ინვესტიცია ჩადო. კომპანიის მოგება 2015 წელს 13 მილიონ ამერიკულ დოლარს აღემატებოდა.

menu.ge დიდი ბრიტანული კომპანიის MENU GROUP UK LIMITED ქართული ფილიალია. კომპანია ოპერირებს საქართველოში, სომხეთში და ბელორუსში.